Link açıqlığı

Aqmescit ava limanı rusiyeli ögrenüvler keçirilecek vaqıtqa qapatıldı, onlarnen seferler lâğu etilgen ve keçiktirilgen


Aqmescit ava limanı sentabr 8-de saat 8:30-dan 12:30-ğa qadar qapalı. Ava limanı matbuat hızmetiniñ bildirgenine köre, bu, «Rusiye Federatsiyası Mudafaa nazirligi «Qavqaz-2016» arbiy ögrenüvlerini keçirgeni sebebinden, vatandaş aviatsiyası seferleriniñ hafsızlığını temin etüvnen» bağlı.

Beyanatta qayd etile ki, işbu vaqıt müddeti devamında uçaq seferleriniñ qabul etilmesi ve yollanılması yapılmaycaq. Amma, ava limanı saytındaki online tablosında bildirdilgenine köre, üyleden soñ 10 ava seferi lâğu etilgen. Çoqusı Moskvağa ketken seferler lâğu etildi. Tahminen 20 sefer keçiktirile, olarnıñ çoqusı da Moskvağadır. Keçiktirilme sebepleri añlatılmay.

İşğal etilgen Qırımda seferlerniñ keçiktirilmesi iyül 18-de başlandı, o vaqıt «VİM AVİA» şirketiniñ yolcuları Aqmescit ava limanında bir künden ziyade seferni bekledi. Bunı tehnikiy meselelernen añlatqan ediler.

Kremlge boysunğan yarımada ükümetinde ava seferleriniñ kütleviy şekilde lâğu etilmesini istekniñ olmağanınen añlattılar.

2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG