«Geroika» hayriye teşkilâtı yañı leyha içün para cıymasını ilân ete: «Ukraina birligi içün uruşlarda elâk olğan Qırım sakinlerine» bağışlanğan hatıra abidesiniñ Herson vilâyeti cenübinde, vaqtınca işğal etilgen Qırım ile sıñır yanında quruvı. Bu aqta Qırım.Aqiqatqa teşkilâtta bildirdiler.
«Hatıra abidesi, taş temelinde Simon Petlüra Haçı Nişanınıñ büyük nushasından ibaret olacaq. Abide boyu granit taşları qoyulacaq, bu yerde Ukraina şarqında rusiyeli tecavuzcı ile uruşlarda elâk olğan 17 Qırım sakininiñ adları yazılacaq. Hatıra abidesi yanında Ukraina devlet bayrağınen 8 metrlik direk tikleycekmiz», – dep añlattılar teşebbüsçiler.
Plan boyunca, hatıra abidesi E-97 yolu yanında qurulacaq, onı Qırımğa ve arqa tarafqa ketken avtomobiller körecek. Onıñ bulunacaq yeri: E-97 yolundan Herson vilâyetiniñ Kalançatskiy rayonındaki Stavki köyüne buruluş.
Umumen olaraq, leyha içün tahminen 40 biñ grivna kerek.
Para cıyılsa, qurucılıq işleri 2016 senesi sentâbr soñunda başlanacaq. Abide qoyuv işlerin, b,r ay içinde bitirmege isteyler.
«Geroika» hayriye teşebbüsi 2010 senesi peyda oldı. Onıñ esas maqsadı, teşkilâtçılarnıñ sözlerine binaen, Birinci (1917 – 1920 seneleri) ve Ekinci (1939 – 1950 seneleri) azatlıq küreşiniñ populârlaştırılmasıdır. Bu teşebbüske er istegen adam qoşula bile.
Ukraina şarqında silâlı dava 2014 senesi baarde, Qırım rusiye tarafından işğal etilgen soñ başlandı. Ukraina ve Ğarp memleketleri Rusiyeni Donbassta separatistlerge qol tutqanı içün qabaatlay. Moskva bu qabaatlavlarnı red ete, ve Donbassta rusiyeli askerler yoq olğanını, amma o yerde «göñülliler» bar olğanını ayta.
