Rusiyeli adliyeci Mark Feygin, Qırımtatar Milliy Meclisi reisiniñ muavini İlmi Umerov ve rusiyeli adliyeci Nikolay Polozov ile beraberlikte, Rusiyede «siyasiy» sebeplerden taqip etilgen qırımtatarlar içün amnistiya aqqında muracaat taqdim etmege niyetlene.
Bu aqta Feygin sentâbr 7-de, çarşenbe künü bildirdi.
«Bugün İlmi Umerovnen ve zenaatdaşım Polozovnen beraber İnsan aqları boyunca şura yolbaşçısı Fedotov ve ombudsmen Moskalkova adına amnistiya aqqında muracaat tizecekmiz. İnsan aqları boyunca şuradan ve Rusiye Federatsiyasında insan aqları boyunca vekâletliniñ apparatından siyasiy işler boyunca qırımtatarlarnıñ amnistiyası aqqında teşebbüsimizge destek köstermelerini bekleymiz», – dep aytıla Feyginniñ beyanatında.
Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.
Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.
Sentâbr 7-de İlmi Umerov klinikadan çıqtı.
İlmi Umerovnıñ imayecileri tahmin etkenlerine köre, endi kelecek afta Umerovnıñ tedaviylenüv içün kardiologiya bölügine keçirilmesi aqqında şefaat arizasına cevap kelecektir. Ailesi onıñ ağır alda bulunğanı aqqında bildire.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
Qırımtatarlarğa qarşı repressiyalar aqqında Meclis, bir sıra halqara uquq qoruyıcı teşkilâtları bir qaç sefer ilân etken edi, amma Qırımnıñ rusiyeli ükümeti ve Kreml bunı red ete.
