Sentâbr 7-de, çarşenbe künü Avropa birligi Rusiyege qarşı sanktsiyalarnı yarım yılğa devam ettirdi. Qarar Avropa birligi devletleriniñ daimiy temsilcileri toplaşuvında alındı, dep bildire Reuters, avropalı diplomatlarnıñ malümatına esaslanıp. Agentlikniñ haber etkenine köre, yañı sıñırlama tedbirleri 2017 senesi mart 15-ke qadar devam etecek.
Sanktsiyalar astında rusiyeli Qırım işğalinen ve Ukraina cenübiy-şarqında silâlı davanıñ başlanmasınen bağlı tahminen 150 adam ve onlarnen teşkilâtlar buluna. Olarnıñ Avropa birligi devletlerine kiriş yasaqlandı, olarnıñ avropalı banklarında aktivleri ise buzlatılğan.
İlk sefer sanktsiyalar 2014 senesi yazda kirsetildi, bundan soñ Avropa birligi cedvelge bir qaç sefer yañı adlarnı kirsetti. Kremlde bildirdiler ki, Qırım işğali qanun boyunca yapıldı ve, cevaplı olaraq, ğarbiy devletlerden bir sıra mallarnıñ italini yasaq etti.
Çarşenbe künü belli oldı ki, AQŞ Rusiyege qarşı sanktsiyalar cedvelini keñleştirdi.
