Link açıqlığı

Qırımtatar Milliy Meclisi reisiniñ muavini İlmi Umerovnıñ qızı Ayşe babasına yapılğan mahkeme-psihiatrik ekspertizanıñ neticelerini añlattı.

«Bugün tibbiy komissiyanıñ ekspertiza neticeleri boyunca toplaşuvı keçirildi. Netice: İlmi Umerov ruhiy taraftan sağlam. Hastahaneden çıqış aqqında vesiqanı elge bermediler. Çünki bu yerge taqiqat şefaatınen ketirdiler, bunıñ içün neticelerni de taqiqatçığa berecekler», – dep yazdı Ayşe Umerova Facebook saifesinde.

Diger menbalardan malümat daa yoq.

Onıñ sözlerine binaen, sentâbr 7-de psihiatrik hastahaneden çıqqan soñ İlmi Umerov Ahtem Çiygoz boyunca mahkemege ketti.

«Psihiatrik hastahanede 21 kün tutulması bile İlmi Umerov kibi insannıñ ruhunı sınmaz. Çıqqan soñ birden Ahtem Çiygoznıñ işi boyunca nevbetteki toplaşuv keçirilgen mahkeme zalına kettik», – dep añlattı Umerovnıñ qızı.

Bunen beraber, o qayd etti ki, psihiatrik hastahaneden azat etilmesi – bu tek başlanuvdır, ögde – mahkeme toplaşuvları, künler daa belgilenmedi.

Bundan da ğayrı, sentâbr 13-ke mecburiy psihiatrik ekspertizanıñ keçirilmesine qarşı şikâyet arizası baqılması boyunca toplaşuvnıñ keçirilmesi planlaştırıldı.

«Bugünki netice – bu kiçik ğalebedir, amma ögümizde daa büyük cenk bar. Ve tek bizim qorantamıznıñ degil de, bütün halqımıznıñdır. Çünki rusiyeli apishanelerde daa çoq vatandaşımız qala. Ve olar içün küreşimizni devam etmek mecburmız. Biz – bu bütün halqımız, bütün Ukraina, bütün dünya», – dep qayd etti Ayşe Umerova.

Rusiyeli FSB Umerovnı mayıs 12-de Bağçasarayda yaqaladı. Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı.

Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi.

Sentâbr 7-de İlmi Umerov klinikadan çıqtı.

İlmi Umerovnıñ imayecileri tahmin etkenlerine köre, endi kelecek afta Umerovnıñ tedaviylenüv içün kardiologiya bölügine keçirilmesi aqqında şefaat arizasına cevap kelecektir. Ailesi onıñ ağır alda bulunğanı aqqında bildire.

Ukraina Tışqı işler nazirliginde ilân ettiler ki, endi nevbette – İlmi Umerovnıñ qanunsız qabaatlanuvını red etmesidir.

«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.

XS
SM
MD
LG