«Hizb ut-Tahrir» ile bağlı olğanında qabaatlanıp, sentâbr 7-de Rostov-na-Donu şeerindeki mahkeme tarafından mahküm etilgen Aqyarlı Ruslan Zeytullayev, Rustem Vaitov, Nuri Primov ve Ferat Sayfullayevniñ adliyecileri qararlarğa qarşı şikâyet etmege azırlana.
«Elbet, imayeciler mahkeme qararınen razı degil, bunı qanunsız ve adaletsiz dep saya», – dep ayttı Rustem Vaitovnıñ adliyecisi Oksana Jeleznâk.
Çarşenbe künü mahkeme toplaşuvı vaqtında mahkemeci ükümniñ tek kiriş ve netice qısımlarını oqudı.
Bunen beraber, Zeytullayevniñ cinayeti Rusiye Cinaiy kodeksiniñ 205.5 maddesiniñ 1-ci qısmından («Rusiye Federatsiyası qanunına binaen, terroristik sayılğan teşkilâtnıñ faaliyetini teşkil etüv») 205.5 maddesiniñ 2-ci qısmına («Rusiye Federatsiyası qanunına binaen, terroristik sayılğan teşkilâtnıñ faaliyetinde iştirak etüv») deñiştirildi ve neticede o, umumiy nizam koloniyasına 7 yılğa qapatıldı. Bundan evel prokuror Qırım sakininiñ qattı nizam koloniyasına 17 yılğa qapatılmasını talap etken edi.
Sayfullayev, Vaitov ve Primovnı mahkeme umumiy nizam koloniyasına 5 yılğa qapattı. Bu, qabaatlanğanlar öz qabaatını tanımağanını köz ögüne alınıp, madde boyunca minimal ola bilecek cezadır.
«Bu, ilk evelâ, mahkeme taqiqatı devamında öyle de tasdıqlanmağan, oña taqdim etilgen qabaatlavnıñ temelsiz olğanını köstere», – dep izaat berdi Jeleznâk.
«Bu, büyük ğalebelerge alıp barğan kiçik dönüm noqtasıdır!» – dep Zeytullayevniñ ükmüne onıñ adliyecisi Emil Kurbedinov izaat berdi.
Üküm çıqarılğan vaqtında «aqyarlı dört kişi» nevbetteki yazılarnen futbolkalarğa kiyingen edi: «Kene de yasaq altında», «Qırımtatarlar», «Sımarış ömürge keçirildi», «Sanalaştırma bitti». Mahkemeci kirgende, qabaatlanğanlar, adaletsiz mahkemege ve Qırım musulmanlarınıñ taqip etilmesine qarşı narazılıq işareti olaraq, ağızlarına skotç yapıştırdı.
Ruslan Zeytullayev, Rustem Vaitov, Nuri Primov ve Ferat Sayfullayev 2015 senesi qışta «Hizb ut-Tahrir» faaliyetinde iştirak etkenlerinen qabaatlanıp, yaqalandı. Dava işi 2016 senesi iyün ayında Rostov arbiy mahkemesine teslim etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
