Link açıqlığı

Sentâbr 7-de, çarşenbe künü Qırımtatar Milliy Meclisi reisiniñ muavini İlmi Umerov Aqmescitte psihiatrik hastahaneden azat etildi, o, bu yerde avgust 18-den başlap yarımada rusiyeli ükümeti tarafından mecburen tutulğan edi.

Bu aqta Aqmescitten İlmi Umerovnıñ yaqınları ve adliyeciler Mark Feygin ve Nikolay Polozov bildirdiler.

Tafsilâtlı malümat bildirilmey. Sentâbr 7-ge mahkeme-psihiatrik ekspertizanıñ neticesini belgilecek ekimler komissiyası toplaşuvınıñ keçirilmesi planlaştırılğan edi.

Mark Feyginniñ bildirgenine köre, «İlmi Umerovnıñ azat etilmesi, imayeciler ögünde qoyğan müim vazifeniñ tek bir qısmı ola. Endi İlminiñ 280-ci madde boyunca qabaatlanuvınıñ lâğu etilmesine irişmek kerekmiz».

Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı.

İlmi Umerovnıñ imayecileri tahmin etkenlerine köre, endi kelecek afta Umerovnıñ tedaviylenüv içün kardiologiya bölügine keçirilmesi aqqında şefaat arizasına cevap kelecektir. Ailesi onıñ ağır alda bulunğanı aqqında bildire.

«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.

XS
SM
MD
LG