İyün 1-den başlap Qırım musulmanlarınıñ «Hizb ut-Tahrir» ile bağlı olğanında qabaatlanuv boyunca dava diñlenüvi keçirilgen Rostov-na-Donu şeerindeki Şimaliy Qavqaz okrug arbiy mahkemesi sentâbr 7-de üküm çıqardı.
Mahkeme qararına binaen, rusiyeli ükümet tarafından «Hizb ut-Tahrir» bölüginiñ teşkilâtçısı dep qabaatlanğan aqyarlı Ruslan Zeytullayev umumiy nizam koloniyasına yedi yılğa, Ferat Sayfullayev, Rustem Vaitov ve Nuri Primov aynı umumiy nizam tüzetme koloniyasına beşer yılğa qapatıldı.
Üküm 15 daqqa içinde ilân etildi.
Avgust 31-de Ruslan Zeytullayev mahkemeni adaletli qarar almağa çağırldı. Onıñ qayd etkenine köre, dört Qırım musulmanınıñ er biri boyunca qarar, olar Rostovğa ketirlmegeninden evel alındı.
Adliyeci Emil Kurbedinov taqiqatnıñ versiyaları mantıqsız olğanını ayttı ve qırımlılarnı qabaatlav boyunca deliller yoq olğanını qayd etti.
Ruslan Zeytullayev, Ferat Sayfullayev, Rustem Vaitov ve Nuri Primov iyün ayında mahküm etilip başladı. Olar 2015 senesi qışta Aqyarda yaqalandı ve «Hizb ut-Tahrir» islâm teşkilâtında iştirak etkenlerinde qabaatlandı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
