İşğal etilgen Qırımda «İlmi Umerovnıñ, em de ayrı noqta-i nazar içün rusiyeli ükümet tarafından repressiyalarğa oğratılğan bütün Ukraina vatandaşlarınıñ taqip etilmesini toqtatmaq içün devlet yolbaşçısınıñ bütün imkânlarını qullanmaq, halqara cemaatçılıqqa destek almaq içün muracaat etmek» talabınen Ukraina prezidenti Petro Poroşenko adına muracaatında biñden ziyade imza cıyıldı.
Bu aqta Aqmescitte psihiatrik hastahanede mecburen tutulğan Qırımtatar Milliy Meclisi reisiniñ muavini İlmi Umerovnıñ qızı Ayşe Umerova bildirdi.
Muracaat altındaki imzalarnı avgust 26-da cıymağa başladılar.
İmza cıymasında iştirak etken Bütün Dünya Qırımtatar Kongressi icra komiteti azası Zevcet Kurtumerov bunı qayd etti: «İlmi Umerov bu künleri psihiatrik hastahaneden çıqabilecegine baqmadan, onıñ cinaiy işi devam etecek, demek ki, ukrain devleti yolbaşçısına muracaatnıñ aktualligi iç te coyulmay».
Onıñ sözlerine binaen, yaqında muracaat Kiyevge teslim etilecek.
Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. Onı avgust 18-de psihiatrik hastahanege ketirdiler. Mahkeme-psihiatrik ekspertizanıñ neticesini belgilecek ekimler komissiyasınıñ toplaşuvı sentâbr 7-de keçirilecektir.
İlmi Umerovnıñ imayecileri tahmin etkenlerine köre, endi kelecek afta Umerovnıñ tedaviylenüv içün kardiologiya bölügine keçirilmesi aqqında şefaat arizasına cevap kelecektir. Ailesi onıñ ağır alda bulunğanı aqqında bildire.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
