Radio Free Europe/Radio Liberty prezidenti Thomas Kent Rusiye akimiyetini qabaatlardan vazgeçip, tedaviylenmesi kerek olğan Qırım jurnalisti Nikolay Semenanıñ esas Ukrainağa çıqmasına izin bermege çağırdı. Bu aqqında sentâbr 6-da Washingtonda tarqalğan Radio Free Europe/Radio Liberty matbuat beyanatında aytıla.
«Qırımdaki akimiyet Nikolay Semenağa qarşı qabaatlarından vazgeçip, muhtac olğan tibbiy yardımnı körmege imkân bermeli», – dep ayttı Thomas Kent.
Kent avgust 1-den itibaren işğal olunğan yarımadada devam etken Qırım.Aqiqat saytınıñ blok etilmesine esaslanıp, Nikolay Semenağa qarşı açılğan iş «Rusiye ve Rusiye qoltutqan (Qırım – QA) akimiyetiniñ Radio Free Europe/Radio Liberty Qırım sakinlerine serbest haberlerni temin etmek jurnalist missiyasına keder etmek ğayretleriniñ bir qısmı» ola.
Bundan evel halqara matbuat taqımları işğal olunğan Qırımda «separatizm» ile qabaatlanğan Qırım jurnalisti Nikolay Semenağa qoltutqanını bildirip, Rusiye akimiyetini oña tibbiy yardım körmesi içün yarımadanı terk etmege çağırdılar.
Halqara ve Avropa jurnalistleri federatsiyasınıñ sentâbr 2-de derc etken muracaatında aytıla ki, Nikolay Semenanıñ yürek hastalığı bar ve acele tibbiy yardım körmese, iş yapamaycaq alına kele bile.
Nikolay Semenanıñ yürek hastalığı bar ve acele tibbiy yardım körmese, iş yapamaycaq alına kele bile
Aprel ayında Nikolay Semena Rusiye Ceza kodeksine köre bu memleketniñ topraq bütünligini bozması ile qabaatlandı. İşbu adise 2014 senesi Moskva zapt etken Qırımnı Ukrainağa qaytarmaq kerek fikri ile maqalesi derc olğan soñ yüz berdi. Al-azırda jurnalist Aqmescitte çıqma yasağı ile buluna.
Qırımtatarca, ukraince ve rusça haberlerni derc etken Qırım.Aqiqat saytı avgust 1-den itibaren Moskva kontrol etken Qırım prokuraturasınıñ ekstremizm ve terrorizm ile küreş idaresiniñ emri ile Qırımdaki internet provayderleriniñ çoqusı tarafından blok etilmekte. Aynı vaqıtta, yarımada sakinleri, Rusiye ve esas Ukrainadaki qullanıcılar saytqa kirmege devam ete, bunı avgust ayında qayd etilgen 1,7 million ziyaret tasdıqlay, dep aytıla matbuat beyanatında. Qırım.Aqiqat Qırımdaki oquyıcılarını radio yayınları vastasınen de haberdar tuta.
Kyivdeki Amerika Qoşma Ştatlarınıñ elçihanesi bu yılnıñ başında Radio Free Europe/Radio Liberty şirketine qarşı yapılğan basqılar sebebinden qasevetlengenini bildirip, «Rusiye ükümetiniñ Rusiye ve Rusiye işğal etken Qırımda serbest seslerge nisbeten sert areketlerni takbih etti».
Halqara jurnalistler federatsiyası ve Avropa jurnalistleri federatsiyası Semenağa qarşı qabaatlarnı «sebepsiz» dep tanıylar.
Aqımdaki seneniñ avgust ayında memleketniñ mustaqilligi yıllığı munasebetinen Petro Poroşenko Nikolay Semenanı «Ukraina mustaqilliginiñ 25 yıllığı» medalinen taqdirledi.
