Link açıqlığı

Polozov: «Çiygoznıñ işi» boyunca mahkemede zararlanğanlar 2014 senesi fevral 26-da keçirilgen mitingniñ maqsatlarını bilmedi


Qırım, Aqmescit, 2014 senesi, fevral 26

İşğal etilgen Qırımda «Çiygoznıñ işi» boyunca endi 11-ci mahkeme toplaşuvı devam ete. Zararlanğanlar sorğuğa çekile.

Toplaşuv teneffüsinde adliyeci Nikolay Polozovnıñ bildirgenine köre, sorğuğa çekilgen zararlanğanlar 2014 senesi fevral 26-da Qırım Muhtar Cumhuriyeti Yuqarı Radası yanında keçirilgen mitingniñ maqsatlarını bilmedi.

«Zararlanğanlarnıñ ne biri, ne de başqası mitingniñ maqsatlarını bilmedi, umumen olaraq bir şeyler televizordan eşitti, vaziyet kerginleştirilgeni aqqında bile edi, amma konkret olaraq Yuqarı şurada neler olacağını ve olar o yerde nasıl maqsat ile toplaşqanını bilmedi. Ekisi de qayd etti ki, Aksönov ve Çubarovnı kördi, olarnıñ ekisi de – Aksönov ve Çubarov – miting iştirakçilerini raat olmağa çağırğan edi», – dep qayd etti Polozov.

Sentâbr 6-da sorğuğa çekilgen eki kişiden iç biri mitingde Ahtem Çiygoznı körmedi, dep qoştı adliyeci.

«Demek ki, qabaatlayıcı taraf qayd etkeni kibi, kütleviy nizamsızlıqta onıñ (Ahtem Çiygoznıñ – QA) yolbaşçılıq rolü aqqında bir şey aytıp olamaylar. Uçqan plastik şişeler, bayraq tayaqları aqqında hatırladılar», – dep añlattı imayeci.

Sentâbr 6-da, salı künü mahkeme toplaşuvı prokurornıñ deñiştirilmesinden başlandı.

Şimdiki vaqıtta zararlanğan kişilerniñ sorğuğa çekilmesi devam ete.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.

Ahtem Çiygoz mahkemede özüni qabaatlı tanımadı.

XS
SM
MD
LG