Link açıqlığı

Poroşenko Rusiyege qarşı Qırım içün qoşma sanktsiyalarnıñ qoşulması kerekligi aqqında ayta


Ukraina prezidenti Petro Poroşenko işğal etilgen Qırımda insan aqları bozuvı içün Rusiyege qarşı qoşma sektor sanktsiyalarnıñ kirsetilmesini kerek olğanını saya. Bu aqta devlet yolbaşçısı sentâbr 6-da Yuqarı Radağa er sene yapqan muracaatında ilân etti.

«İşğal etilgen topraqlarda Rusiye tarafından insan aqları, bu cümleden qırımtatarlarnıñ aqları bozulması, qoşma sektor sanktsiyalarınıñ kirsetilmesini talap ete. Bellesem, Jekson-Venik tüzetmesiniñ analogını qabul etmek içün zemaneviyleştirilgen subet artqaç olmaz», – dedi prezident.

Onıñ qayd etkenine köre, Qırım, onıñ askerleştirilmesi, yarımadada insan aqları bozulması meselesini «daima halqara kün tertibinde tutmaq ve mütenasip sanktsiya paketini keñleştirmege tırışmaq kerek», keçken afta AQŞ bunı yapqanı kibi.

Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG