İşğal etilgen Qırımnıñ Kremlge boysunğan Yuqarı mahkemesiniñ Qırımtatar Milliy Meclisi reisiniñ muavini Ahtem Çiygoznıñ işi boyunca toplaşuvı salı künü prokurornıñ deñiştirilmesinden başlandı. Bu aqta Çiygoznıñ rusiyeli adliyecisi Nikolay Polozov bildirdi.
«Ahtem Çiygoznıñ işi boyunca mahkeme davası (11-ci mahkeme künü). Toplaşuv prokurornıñ deñiştirilmesinden başlandı. Dombrovskiy tatilge ketti. Yañı prokuror – Suprâga Anastasiya İvanovna. Amma o, işke kirme aqqı aqqında emirni taqdim etmedi», – dep yazdı Polozov Twitterde.
Onıñ bildirgenine köre, yañı prokurorğa «davanıñ neticesinde meraqlanğanı sebebinden» red etüv ilân etildi. Bundan da ğayrı, prokurorğa vesiqalarnı taqim etmek içün vaqıt bermek maqsadınen teneffüs berilmesi aqqında imayeniñ şefaat arizası da ilân etildi. Mahkeme bu arizanı qanaatlendirmedi.
Şimdiki vaqıtta zararlanğan kişilerniñ sorğuğa çekilmesi devam ete.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Ahtem Çiygoz mahkemede özüni qabaatlı tanımadı.
