Link açıqlığı

Rusiye Yuqarı mahkemesi Meclisniñ yasaq etilmesine qarşı şikâyet arizasını sentâbr 29-da baqacaq


Rusiye Federatsiyası Yuqarı mahkemesi sentâbr 29-da Qırımtatar Milliy Meclisiniñ yasaq etilmesine qarşı şikâyet arizasını baqacaq. Meclis yasaqlanmasına qarşı şikâyet boyunca toplaşuv Rusiye Yuqarı mahkemesi saytında yerleştirilgen baqılacaq işler cedvelinde qayd etilgen.

«Ariza (dava) boyunca şikâyet: «Qırımtatar Milliy Meclisi» cemaat birleşmesiniñ faaliyetiniñ «Ekstremistik faaliyetke qarşılıq aqqında» Federal qanunınıñ 1145-FQ sanlı 25.07.2002 qabul etilgen 9-cı maddesinde belgilengen tertip ve temeller boyunca yasaq etilmesi aqqında», – dep qayd etile işniñ añlatılmasında.

Toplaşuvnıñ keçirilmesi saat 11:00-ge belgilendi.

Aprel 26-da Rusiye kontrol etken Qırım Yuqarı mahkemesi yarımadada Meclis faaliyetini yasaq etti. Dünya toplulığı Rusiye akimiyetiniñ böyle areketlerine qattı narazılıq bildirdi. Meclis imayesi Rusiye Yuqarı mahkemesine apellâtsion şikâyetini berdi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG