Link açıqlığı

Ukrain istihbaratı: rusiyeli «Qavqaz-2016» ögrenüvleriniñ maqsadı – Qırım işğalini qanunlaştırmaqtır


Ukraina Mudafaa nazirliginiñ Baş istihbarat idaresiniñ qıymet keskenine köre, rusiyeli «Qavqaz-2016» arbiy ögrenüvleriniñ içki ve tışqı saadaki bir sıra siyasiy maqsatları bar. Bu cümleden, işğal etilgen Qırımnıñ rusiyeli statusını qanunlaştırmaq ıntıluvdır.

Bu aqta Kiyevde keçirilgen matbuat konferentsiyasında Ukraina Mudafaa nazirliginiñ Baş istihbarat idaresiniñ temsilcisi Vadim Skibitskiy ilân etti.

«Vatandaşlarnıñ diqqatını parlament saylavları arfesinde içtimaiy-iqtisadiy problemalardan almaq: içki problemalardan – tışqı problemalarğa. Ve ekincisi – yarımada toprağına ecnebiy resmiy temsilcilerniñ ziyaretleri vastasınen Qırım işğalini qanunlaştırmaq. Bunıñ içün, Opuk poligonında keçirilecek 2016 senesi ögernüvlerniñ faal basamağına sentâbr 9-ğa Moskvada akkreditatsiyadan keçken diger devletlerniñ diplomatik müessiseleriniñ arbiy temsilcileri davet etildi», – dedi Skibitskiy.

Ukrain istihbaratınıñ malümatına binaen, bir sıra demokratik devletler merasimde iştirak etmekten vazgeçti. Skibitskiyniñ sözlerine köre, Vyetnam, Venesuela, Ekvador, Kolumbiya, Malayziya, Mavritaniya, Moğolistan, Sırbistan ve Urugvay ziyaretke razı oldı.

Ukrain istihbaratında tüşüneler ki, ögrenüvler vaqtında Qırımğa keçirilgen quvetler, Rusiye yolbaşçıları mütenasip qarar alacaq olsa, Ukrainağa qarşı qullanıla bile.

Sentâbr 5-te, bazarertesi künü Rusiye Cenübiy arbiy okrug (CAO) toprağında «Qavqaz-2016» taqım-ştab strategik ögrenüvleri başlandı.

Sentâbr 10-ğa qadar devam etecek çgrenüvlerde tahminen 12,5 biñ asker iştirak ete, aviatsiya, arbiy tehnika ve gemiler celp etile. İdmanlar CAO poligonlarında, Qara deñiz ve Hazar deñizi suv alanında keçirilecek.

Ekspertlerniñ fikrince, «Qavqaz-2016» ögrenüvlerinde Rusiye Federatsiyasınıñ silâlı quvetleri Ukrainağa qarşı ameliyatnı işlep baqacaq.

Avgust 18-de Ukraina prezidenti Petro Poroşenko ilân etti ki, Rusiye kütleviy şekilde Ukrainağa kire bile ve böyle alda arbiy vaziyet kirsetile bilecegini ayttı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG