Link açıqlığı

«Qavqaz-2016» ögrenüvlerinde cenk alıp barılması alışqanlıqları işlep baqılacaq – Rusiye Mudafaa nazirligi


Sentâbr 5-te, bazarertesi künü Rusiye Cenübiy arbiy okrug (CAO) toprağında «Qavqaz-2016» taqım-ştab strategik ögrenüvleri başlandı. Rusiye Federatsiyası Mudafaa nazirligi matbuat hızmetiniñ bildirgenine binaen, ögrenüvler 2016 senesi taqım-ştab, mahsus ögrenüvler, arbiy idare organları idmanları, ordunıñ (quvetlerniñ) arbiy azırlığını apansız teşkerüv kompleksiniñ yekünleyici basamağı ola.

«Ögrenüvler çerçivesinde orduğa (quvetlerge) yolbaşçılıq etüv boyunca arbiy idare organlarınıñ azırlıq seviyesi teşkerilecek, bunen beraber, komandanlar ve ştablarğa arbiy faaliyetni planlaştıruv, azırlav ve alıp barma boyunca ameliyat berilecek», – dep aytıla rusiyeli arbiy müessiseniñ beyanatında.

Sentâbr 10-ğa qadar devam etecek çgrenüvlerde tahminen 12,5 biñ asker iştirak ete, aviatsiya, arbiy tehnika ve gemiler celp etile. İdmanlar CAO poligonlarında, Qara deñiz ve Hazar deñizi suv alanında keçirilecek.

Ekspertlerniñ fikrince, «Qavqaz-2016» ögrenüvlerinde Rusiye Federatsiyasınıñ silâlı quvetleri Ukrainağa qarşı ameliyatnı işlep baqacaq.

Ukrain istihbaratınıñ malümatına binaen, «Qavqaz-2016» ögrenüvleri çerçivesinde Cenübiy arbiy okrugı ordusınıñ operativ çıqması ve onıñ Ğarbiy ve Orta arbiy okruglarnıñ ava, topraq ve yüksekmobil komponentleri vastasınen çoqlaştırılması yapıla.

Avgust 18-de Ukraina prezidenti Petro Poroşenko ilân etti ki, Rusiye kütleviy şekilde Ukrainağa kire bile ve böyle alda arbiy vaziyet kirsetile bilecegini ayttı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG