Link açıqlığı

Kiyevde Dmitriyevskaya soqağında yerleşken «İnter» telekanalınıñ binası yanına, narazılıq aktsiyası keçirilgen yerge şinalar (çemberler) ketirildi. Radio Svoboda mühbiriniñ bildirgenine köre, narazılıq bildirgenler şinalarnı qora yanında qoydı.

Telekanal binası yanında onlarnen adamlar buluna, esasen ATO veteranları, hususan «Aydar», «Donbass», «Svâtaya Mariya» batalyonlarınıñ timsallerinen adamlar bar.

Mühbirniñ malümatına binaen, «İnter» temsilcileri aktsiya iştirakçilerine çıqmadı, beyanatlar olmadı.

Bundan evel bazarertesi künü narazılıq bildirgenler telekanalnı blok etüv boyunca müddetsiz aktsiyanı başlağanlarını ilân etti.

Sentâbr 4-te, bazar künü Kiyevdeki Şuseva soqağında, diger programmalardan ğayrı, «İnter» telekanalı içün «Podrobnosti» programmasını çıqarğan şirketniñ binasında yanğın yüz berdi.

Kiyev politsiyasında bildirdiler ki, sentâbr 4-te şahıslar taqımı, tahminen 20 adam, Şuseva soqağındaki bina yanına keldi, turistik çadırlar qoydı ve çemberler (şinalar) ketirdi, bundan soñ çemberlerni yaqtılar ve binağa, ilk malümatlarğa binaen, tuman şaşkasını attılar, yanğın başlandı. Uquq qoruyıcılarnıñ malümatına binaen, tıbbiy yardım almaq içün yedi kişi muracaat etti. Vaqia Ukraina Cinaiy kodeksiniñ «yaramazlıq» ve «malnı mahsus bozuv ya da zarar ketirüv» maddeleri boyunca taqiq etile.

Bundan soñ «İnter» telekanalı ilân etti ki, yanğın neticesinde «Podrobnosti» programmasınıñ studiyası bütünley yandı, bunen beraber, bazı hadimler zararlandı.

Terkibine «İnter» telekanalı kirgen Inter Media Group vaqia şaraitini obyektiv şekilde taqip etmesini talap ete, bunen beraber, Ukraina prezidentine «qanunnı ve uquqqa qarşı areketlerden saqlavnı tiklemek» maqsadınen vaziyetke kirişmek çağıruvınen muracaat ete.

Ukraina Fevqulade vaziyetler devlet hısmetinde haber ettiler ki, bu yanğın neticesinde elâk olğanlar ya da yaralanğanlar olmadı.

Ukraina Mühbirler milliy birligi telekanalğa yapılğan ücümni takbih etti.

«İnter» telekanalına qarşı endi bir qaç sefer piket yapılğan edi, hususan fevral ayında yüz bergen vaqia sebebinden, o vaqıt «Podrobnosti nedeli» («Afta tafsilâtları») programmasınıñ prodüseri rusiyeli Mariya Stolârova canlı yayında sögüş sözlerini ayttı, bundan soñ onı Donbasstaki silâlı taqımlarğa nisbeten simpatiya duyğanında qabaatladılar ve devletten sürgün ettiler.

2013 senesiniñ başında Dmitriy Firtaşnıñ GDF Media Limited şirketi Valeriy Horoşkovskiyniñ K.H. Media Limited şirketinden Inter Media Groupnı satın aldı.

«İnter» telekanalı Ukrainanıñ üç eñ populâr telekanalından biri ola.

XS
SM
MD
LG