Link açıqlığı

Saatnıñ esas haberi

Qırımda çoq daireli evlerniñ tamirine mecburiy tölev kirsetile


İllüstratsiya fotoresimi
İllüstratsiya fotoresimi

Endi 2016 senesi oktâbr 1-den başlap, çoq daireli evlerde yaşağan Qırım yarımadası sakinleri, adiy mecburiy daire tölevinden ğayrı, evleriniñ tamiri içün de tölemek mecbur olacaq. Şimdilik bunıñ fiyatı, saibiniñ mülkü olğan mesken odasınıñ umumiy meydanından (ğayrı mesken) 1 kvadrat metr içün 6,16 ruble teşkil etecek, dep bildirdiler işğal etilgen Qırımnıñ Kremlge boysunğan Mesken-kommunal hocalığı nazirliginiñ matbuat hızmetinde.

Tölev imtiyazlı vatandaşlarğa da bağlı, istisna olaraq 70 yaşından büyük olğanlar. Meselâ, umumiy meydanı 50 metrden biraz ziyade olğan standart eki odalı daire içün 450 ruble (166 grivna) tölevge 320 ruble miqdarında er ay tölengen öz isteginen-mecburiy tölev qoşulacaq.

Müessiseniñ malümatına binaen, Rusiyede çoq daireli evlerniñ kapital tamir etilmesi programması otuz yılğa qararınen yapılğan. Qırım, programmağa endi qoşulğan yekâne region ola, bunıñ içün er ev tamir işleri alıp barılması cedveline nevbetke kirsetilecek.

Yerli öz-özüni idare etüv organları kapital tamir fondunı teşkil etmek ve regional operatornı belgilemek kerek, qaysı biri mesken fondunı tamir etecek ve tamir etilgen evler vaziyeti aqqında internet ağında malümatnen vaqtında paylaşacaq. Şimdiki vaqıtta bütün şeerlerde mülk saipleriniñ umumiy toplaşuvları keçirile, o yerde kapital tamir fondunıñ teşkil etilmesi usulını saylaylar. Amma sakinlerniñ çoqusı bu ameliyat aqqında aqiqaten tek eşitkenler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG