Sentâbr 5-te, bazarertesi künü Aqmescit ava limanında Moskvağa eki uçaq seferi, ve Voronej, Kursk ve Mineralnıye Vodı şeerlerine seferler lâğu etildi. Bu aqta ava limanı saytındaki online tablosında bildirile.
Uçaq seferleriniñ lâğu etilmesi sebepleri bildirilmey.
Qırım Rusiye tarafından işğal etilgen soñ Aqmescit ava limanı tek rusiyeli ava şirketlerinen çalışa ve halqara seferler içün qapalı. Bu yerde kütleviy şekilde seferlerniñ lâğu etilmesi iyün ayı ortasından başlandı, bunıñ tehnikiy problemalarnen bağlı olğanını aytalar.
Aqyarnıñ vaqtınca tayinlengen yolbaşçısı Dmitriy Ovsânnikov bildirdi ki, Aqmescit ava limanı imkânlarnıñ sıñırında çalışa ve bu Rusiyenen ava seferlerini telüke astına qoya.
2014 senesi mart ayında yarımada Rusiye tarafından işğal etilgen soñ, Qırım ava limanları Ukraina ükümetiniñ qararınen qapatıldı. O yerge ve o yerden er angi uçuşlar Ukraina qanunlarını ve halqara qaidelerni boza, bunıñ içün ava şirketleri Ukraina ve İKAO tarafından halqara sanktsiyalarğa oğray bile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
