Politsiya «İnter» telekanalınıñ ofisini yaqma işi boyunca şeklenilgen altı kişini yaqalağanı aqqında bildire. Bu aqta «112 Ukraina» telekanalınıñ yayınında Kiyev Milliy politsiyası baş idaresiniñ yolbaşçısı Andrey Krişenko ayttı.
Onıñ sözlerine köre, uquq qoruyıcılar cinayetni nevbetteki maddeler boyunca taqiq ete: Ukraina Cinaiy kodeksiniñ 296-cı (yaramazlıq) ve 194-ci (malnı mahsus bozuv) maddeleri.
Milliy politsiya hadimleri Şevçenko rayon bölügine bu yanğınnen bağlı olğanında şeklenilgen 6 kişini ketirdi, olarnıñ şahsiyetleri ve yanğınnen bağlı olğanları belgilene, dep qoştı Krişenko.
Kiyev politsiyasında bildirdiler ki, sentâbr 4-te şahıslar taqımı, tahminen 20 adam, Şuseva soqağındaki bina yanına keldi, turistik çadırlar qoydı ve çemberler (şinalar) ketirdi, bundan soñ çemberlerni yaqtılar ve binağa, ilk malümatlarğa binaen, tuman şaşkasını attılar, yanğın başlandı.
Bundan soñ «İnter» telekanalı ilân etti ki, yanğın neticesinde «Podrobnosti» programmasınıñ studiyası bütünley yandı, bunen beraber, bazı hadimler zararlandı.
Ukraina Fevqulade vaziyetler devlet hısmetinde haber ettiler ki, bu yanğın söndürilgen vaqtında elâk olğanlar ya da yaralanğanlar olmadı.
Terkibine «İnter» telekanalı kirgen Inter Media Group vaqia şaraitini obyektiv şekilde taqip etmesini talap ete, bunen beraber, Ukraina prezidentine «qanunnı ve uquqqa qarşı areketlerden saqlavnı tiklemek» maqsadınen vaziyetke kirişmek çağıruvınen muracaat ete.
«İnter» telekanalına qarşı endi bir qaç sefer piket yapılğan edi, hususan fevral ayında yüz bergen vaqia sebebinden, o vaqıt «Podrobnosti nedeli» («Afta tafsilâtları») programmasınıñ prodüseri rusiyeli Mariya Stolârova canlı yayında sögüş sözlerini ayttı, bundan soñ onı Donbasstaki silâlı taqımlarğa nisbeten simpatiya duyğanında qabaatladılar ve devletten sürgün ettiler.
2013 senesiniñ başında Dmitriy Firtaşnıñ GDF Media Limited şirketi Valeriy Horoşkovskiyniñ K.H. Media Limited şirketinden Inter Media Groupnı satın aldı.
«İnter» telekanalı Ukrainanıñ üç eñ populâr telekanalından biri ola.
