Avropa Şurasında Ukraina daimiy temsilcisi, Ukraina Tışqı işler nazirliginiñ mahsus avaleler boyunca elçisi Dmitriy Kuleba Rusiyeniñ Qırımnı işğal etkeni içün mesüliyeti meselesi Kiyev içün açıq olğanını ayttı. Bu aqta Kuleba Twitterde yazdı.
«Qırım meselesi, kerçekten de, qapalı. Qırım – bu Ukraina. Rusiyeli ükümetniñ işğal içün mesüliyeti şekli meselesi açıqtır», – dep yazdı Kuleba.
Diplomatnıñ beyanatı, Rusiye prezidenti Vladimir Putin sentâbr 3-te Vladivostokta Qırımnıñ qaytarılması meselesi «tarihiy qapatıldı» dep aytqanından bir qaç saat keçken soñ peyda oldı.
«Sabıq nizamğa iç qaytaruv yoq», – dedi Putin.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
