Özbekistan ükümeti «İnterfax» agentliginiñ, ükümetke esaslanıp, devlet prezidenti İslam Karimovnıñ ölümi aqqında bildirgen beyanatını red etti.
Bundan evel bildirilgen edi ki, Karimov insult sebebinden soñ derece ağır alda buluna. Bu aqta cuma künü Özbekistan ükümeti bir qaç kün sükütten soñ ilân etti. Malümat, ükümet gazetasında derc etilgen ve televizionda oqulğan nazirler kabinetiniñ beyanatından alınğan.
Ükümetniñ malümatına binaen, Karimov avgust 24-te insulttan soñ hastahanege ketirildi ve soñki kün devamında onıñ alı «pek yaramaylaştı, ekimler onıñ soñ derece ağır olğanını saya».
Bundan evel Reuters agentligi, üç diplomatik menbağa esaslanıp, 78 yaşındaki Karimovnıñ ölgeni aqqında haber etti.
Sentâbr 2-de Tükriye baş naziri Binali Yıldırım, televizionda yayınlanğan ükümet toplaşuvında sözde bulunıp, ilân etti ki, «Özbekistan prezidenti İslam Karimov elâk oldı», ve «Allahnıñ rahmetinde olsun, Türkiye Cumhuriyeti özbek halqınıñ ağrı ve qaar-qasevetini böle», dep qoştı. Türkiye memurları qaydan malümat alğanı aqqında belli degil.
Radio Svoboda Özbek hızmeti bildirdi ki,Türkiye baş naziri Binali Yıldırım, prezident İslam Karimovnıñ ölümi munasebetine özbek halqına taziye bildirdi. Türkiye ükümeti yolbaşçısınıñ çıqışı TRT Haber telekanalında kösterildi.
Bunen beraber, Radio Svoboda Özbek hızmeti Taşkentte soqaqlardan bütün bayraqlar alınğanını bildirdi. Tünevin Özbekistanda devlet mustaqilliginiñ 25 yıllığı qayd etile edi.
Avgust 27-den, Özbekistan ükümeti Karimovnıñ hastahanede bulunğanı aqqında resmiy beyanat bildirgen vaqıttan berli, kütleviy haber vastalarında özbek lideriniñ alı aqqında bir birine ters kelgen malümatlar peyda ola.
Avgust 29-da «Fergana» mustaqil haber agentligi ve özbek uquq qoruyıcı teşkilâtlar Karimovnıñ ölümi aqqında bildirdi; rusiyeli resmiy kütleviy haber vastaları, öz menbalarına esaslanıp, bu malümatnı red etti; Özbekistan ükümeti bu mevzu boyunca izaat bermegen edi.
Tünevin aqşam «Fergana» agentligi Özbekistan prezidentiniñ tuvğan Samarkand şeerinde qurucılıq işleri alıp barılğanını köstergen fotoresimlerni paylaştı, bunıñ cenazege azırlıq olğanını ayttı. Radio Svoboda Özbek hızmeti Samarkand şeerine cumhuriyet baş naziri Şavkat Mirziyayevniñ kelgeni aqqında bildirdi.
