Adliyeci Cemil Temişev bildirdi ki, rusiyeli uquq qoruyıcılar Aqmescitte tintüvni keçirmek içün mühbir Elmaz Abduveliyevağa degil de, onıñ ana-babasına keldi. O, vaqianıñ siyasiy olğanını tüşünmey. Bu aqta adliyeci Qırım.Aqiqatqa bergen izaatında bildirdi.
«Tintüv onıñ ana-babasında hocalıq işi munasebetinen keçirildi. Bu, onıñ zenaat faaliyetinen iç te bağlı degil. Onı keçirgen hadimler onıñ mühbir olğanını bilmedi bile», – dedi Temişev.
O, uquq qoruyıcılarnıñ Abduveliyevler evine tintüvnen kelmeleri içün sebep olğan iş aqqında tafsilâtlı malümat bermekten vazgeçti. Şimdilik tintüv yekünlendi.
Cemil Temişevniñ sözlerine binaen, uquq qoruyıcılar tarafından bütün areketler rusiyeli qanunlar boyunca yapılğan. Bunen beraber, o, mühbirniñ evinde qapı qırılğanı aqqında malümatnı red etti.
Sentâbr 2-de saba mühbir Lilâ Bucurova Crimean Tatars internet-portalı mühbiri Elmaz Abduveliyevanıñ evinde tintüv keçirilgeni aqqında bildirdi.
Avgust başından Qırımda qırımtatarlar aqqında Crimean Tatars saytı çalışıp başladı. Bu portal qırımtatarlarnıñ medeniyeti, adetleri, tili ve tarihı aqqında añlata.
2015 senesi aprel 1-den başlap yarımadada ATR media-holdinginiñ qırımtatar kütleviy haber vastaları, yani ATR ve Lâle telekanalları, Meydan radiosı qapatıldı. Bu adımnı AQŞ, Avropa birligi, OSCE, Amnesty International takbih etip, onı yarımadada qırımtatarlarnıñ taqip etilmesi dep adlandırdı.
