Meclis reisiniñ muavini İlmi Umerovnıñ Facebook saifesinde destek içün teşekkür ve bütün dünya boyunca siyasiy mabuslarğa cemaatçılıqnıñ diqqatını celp etmek muracaatınen beyanat paylaşıldı.
«Sizni diger Qırım siyasiy mabusları – bir qaç aydan bir yarım yılğa qadar SİZO-da bulunğan cesür adamlar – aqqında da aytmağa çağıram... Namusını ve doğrusını hain etmegen adamlar, yalan ve iftira yerine istenilgen azatlıqnı almağa red etken adamlar aqqında. Dünya Qırımda işğalci ükümet tarafından etilgen repressiyalar aqqında bilmeli! Yaqın künlerde psihiatrik hastahaneni terk etip olsam da, Qırımdaki repressiyalar qurbanlarına destegiñizni bir saniyege bile toqtatmamañıznı rica etem», – dep bildirile Umerovnıñ saifesinde.
Beyanatta bütün dünya boyunca siyasiy mabuslarğa destek aktsiyalarına çıqmağa muracaat etile.
Sentâbr 2-de Kiyevde Rusiye Federatsiyası elçiligi yanında «Adamlarnı degil de, tereklerni oturtıñız!» aktsiyası keçirile. Aktsiyanıñ esas maqsadı – Meclis reisiniñ muavini İlmi Umerovnıñ mecburiy şekilde psihiatrik hastahanede tutulmasına qarşı narazılıq bildirmek, ve «yarımada işğalci ükümetine tesir etmektir».
İşğal etilgen Qırım ükümeti 59 yaşındaki İlmi Umerovnı televizion yayınında «Rusiyeni Qırımdan ve Donbasstan çıqmaq mecbur etmek kerek» degen sözleri içün Rusiye topraq bütünligini bozmaq çağıruvlarda qabaatlaylar. Avgust 11-de Meclis reisiniñ muavini, sağlıq alına baqmadan, mahkeme qararına binaen psihiatrik hastahanege ekspertizağa ketirildi. İmayeciler bu qararğa qarşı şikâyet arizasını berdi.
Rusiyeli adliyeci Nikolay Polozov Umerovnıñ ağır alı aqqında bildirgen edi.
Mahkeme-psihiatrik ekspertizanı keçirecek ekimler komissiyasınıñ toplaşuvı sentâbr 7-de keçirilecektir.
Resmiy Kiyev İlmi Umerovnı azat etmege bir qaç sefer talap etken edi. Keçken afta Avropa Birligi Rusiyeni Umerovnı deral azat etmege çağırdı. AQŞ Devlet Departamentinde Qırımtatar Milliy Meclisi reisiniñ muavini İlmi Umerovnıñ işğal etilgen Qırımda psihiatrik hastahanede tutulğanından qasevet çekkenlerini bildirdiler ve Rusiyeden onı azat etmege talap ettiler. Ukrainada Büyük Britaniya elçiligi de aynı çağıruv ile muracaatta bulundı.
