Ukraina Tışqı işler nazirligi işğalci ükümetniñ qırımtatar halqına nisbeten qanunsız areketlerini, hususan Crimean Tatars leyhasınıñ mühbiri Elmaz Abduveliyevanıñ evinde keçirilgen tintüvni qattı takbih ete. Bu aqta Qırım.Aqiqatqa Ukraina Tışqı işler nazirliginiñ matbuat kâtibi Maryana Betsa bildirdi.
«Qırımtatarlarnıñ aqlarını bozuv devam ete, aqiqaten bütün esas aq-uquqlar ve serbestlikler bozula. Ve soñki eki yıl devamında Kreml yarımadanı qorquzma ve taqip etüv zonasına çevirdi. Biz kene de işğalci devletten Qırım tamır halqına qarşı repressiyalarnı toqtatmağa çağıramız», – dep qayd etti Betsa.
Onıñ sözlerine binaen, bugün Elmaz Abduveliyevanen olğan vaqia pek kösterici ola, çünki ameldeki Qırım ükümeti söz serbestligi, kütleviy haber vastaları serbestliginden qorqa. Olarnıñ maqsadı – dünya toplulığınıñ yarımadadaki kerçek vaziyet aqqında haberdar etilmesine yol bermemektir.
ATR qırımtatar telekanalınıñ baş müdiri muavini Ayder Mujdabayev Ukraina diplomatik hızmetlerinden «deral ve qattı cevabını» talap etti.
Sentâbr 2-de saba rusiyeli Qırım mahsus hızmetleri Crimean Tatars internet-portalı mühbiri Elmaz Abduveliyevanıñ evinde tintüv keçirip başladı. Qırım mühbiri, cemaat erbabı Lilâ Bucurovanıñ Facebook saifesinde yazğanına binaen, uquq qoruyıcı strukturalarınıñ temsilcileri qapını qırdı, vesiqalarnı taqdim etmeyip ve sebeplerni añlatmayıp, tintüv keçirmege başladı.
Avgust başından Qırımda qırımtatarlar aqqında Crimean Tatars saytı çalışıp başladı. Bu portal qırımtatarlarnıñ medeniyeti, adetleri, tili ve tarihı aqqında añlata.
2015 senesi aprel 1-den başlap yarımadada ATR media-holdinginiñ qırımtatar kütleviy haber vastaları, yani ATR ve Lâle telekanalları, Meydan radiosı qapatıldı.
2016 senesi baarde Qırımda kütleviy şekilde tintüvler, bu cümleden, Qırım.Aqiqat ile işbirlik tutqanında şeklenilgen mustaqil mühbirlerde tintüvler keçirildi.
Qırım Rusiye tarafından işğal etilgen soñ, Kreml tarafından tayinlengen yarımada ükümetiniñ siyasetinen razı olmağan eñ azdan 10 Qırım kütleviy haber vastası Ukraina qıtaiy qısmına ketmege mecbur oldı.
Ukraina Yuqarı Radası Rusiyeniñ vaqtınca Qırım işğaliniñ başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
