Şimdiki vaqıtta Keriç parom keçitinde faaliyetni idare etken «Deñiz müdirligi» yolcularnıñ sayısı azlaşqanını bildire. Soñki kün devamında 38 433 yolcu ve 12 135 yengil avtomobil keçirildi, dep bildireler müdirlikte. Meselâ, mevsimniñ eñ yüksek derece olğan vaqıtta keçitten 58 744 insan ve 17 189 maşna keçti.
«Paromlar 8-10 seferli cedvelge keçirildi, yüklenme beklenüvi ise 20-30 daqqa ala. Bu vaqıt devamında avtomobil saipleri biletler ala, nezaret noqtalarından keçe ve paromğa keçe», – dep qayd etile «Deñiz müdirligi» saytında.
Keriç boğazında parom keçiti Qırımnı Rusiye Federatsiyasınıñ Krasnodar ülkesinen bağlağan esas naqliye yolu ola. Ukraina qanunlarına köre, işğal etilgen Qırımğa Keriç parom keçitinden kiriş yasaqtır ve devlet sıñırı keçüvine musaviydir.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
