Sentâbr 2-de saba rusiyeli Qırım mahsus hızmetleri Crimean Tatars internet-portalı mühbiri Elmaz Abduveliyevanıñ evinde tintüv keçirip başladı. Qırım mühbiri, cemaat erbabı Lilâ Bucurovanıñ Facebook saifesinde yazğanına binaen, uquq qoruyıcı strukturalarınıñ temsilcileri qapını qırdı, vesiqalarnı taqdim etmeyip ve sebeplerni añlatmayıp, tintüv keçirmege başladı.
Avgust başından Qırımda qırımtatarlar aqqında Crimean Tatars saytı çalışıp başladı. Bu portal qırımtatarlarnıñ medeniyeti, adetleri, tili ve tarihı aqqında añlata.
2015 senesi aprel 1-den başlap yarımadada ATR media-holdinginiñ qırımtatar kütleviy haber vastaları, yani ATR ve Lâle telekanalları, Meydan radiosı qapatıldı. Bu adımnı AQŞ, Avropa birligi, OSCE, Amnesty International takbih etip, onı yarımadada qırımtatarlarnıñ taqip etilmesi dep adlandırdı.
2016 senesi baarde Qırımda kütleviy şekilde tintüvler, bu cümleden, Qırım.Aqiqat ile işbirlik tutqanında şeklenilgen mustaqil mühbirlerde tintüvler keçirildi. Radio Svoboda müellifi Mıkola Semenağa qarşı Rusiye Federatsiyasınıñ topraq bütünligini bozmaq çağırğanında şeklenilüv boyunca cinaiy iş açıldı. Rusiyeli taqiqat oña yarımadadan çıqmağa yasaq etti.
Qırım Rusiye tarafından işğal etilgen soñ, Kreml tarafından tayinlengen yarımada ükümetiniñ siyasetinen razı olmağan eñ azdan 10 Qırım kütleviy haber vastası Ukraina qıtaiy qısmına ketmege mecbur oldı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
