Link açıqlığı

Qırımda Rusiye akimiyeti tarafından 2014 senesi fevral 26-da «kütleviy çatışmalarnıñ teşkil etilmesi» ile qabaatlanıp mahküm etilgen Ahtem Çiygoznıñ ömür arqadaşı Elmira Ablâlimova Çiygoznıñ mahkeme toplaşuvı vaqtında bulunğan şaraitlerni añlattı.

Ahtem Çiygoz işğal altındaki Qırımnıñ Rusiye kontrol etken Yuqarı mahkemesiniñ toplaşuvında videokonferentsiya vastasınen iştirak ete.

Oda avasız, taze ava kirmey... O, bulunmaqnen beraber, çalışmağa, sual bermege tırışa
Elmira Ablâlimova

«Oda avasız, taze ava kirmey... O, bulunmaqnen beraber, çalışmağa, sual bermege tırışa, o, advokatlarnen beraber özüni qorçalay. Pek tertipli», – dep qayd etti Elmira Ablâlimova «Gromadske radio» izaatlarında.

Onıñ aytqanına köre, Ahtem Çiygoz bu şaraitlerde sekizer saat buluna, o, avasız ve küneşsiz yaramay.

Mahkeme Ahtem Çiygoznı toplaşuv zalına ketirmey.

«Çiygoz işi» boyunca sentâbr 1-de sorğuğa çekilgen zarar körgenlerden iç biri onıñ kütleviy çatışmalarnıñ teşkil etilmesinde oynağan rolüni aytmadı
Nikolay Polozov

Qırımtatar Milliy Meclisiniñ reis muavininiñ Rusiye advokatı Nikolay Polozovnıñ bildirgenine köre, «Çiygoz işi» boyunca sentâbr 1-de sorğuğa çekilgen zarar körgenlerden iç biri onıñ kütleviy çatışmalarnıñ teşkil etilmesinde oynağan rolüni aytmadı.

Polozovnıñ izaatı ile video Qırımtatar Milliy Qurultayı Merkeziy saylav komissiyasınıñ reisi Zair Smedlâyev tarafından Facebook saifesinde qoyuldı.

Polozovnıñ aytqanına köre, Ukraina İçki işler nazirliginiñ sabıq hadimi Sergey Sinetskiy sentâbr 1-de zarar körgen kişi olaraq çıqışta bulunıp, «Ahtem Çiygoznıñ bulunması ve areketlerine dair tam bir şey aytıp olamadı».

«O, ondan (Ahtem Çiygozdan – QA) nefret etmegenini bildirdi», – dep qayd etti advokat.

Polozovnıñ aytqanına köre, zarar körgen kişi Çiygoznı çoqtan tanığanını bildirip, 2014 senesi fevral 26-da olıp keçken adiselerde onıñ rolü ne olğanını añlatıp olamadı.

Avgust 30-da olıp keçken toplaşuvda Nikolay Polozov qayd etti ki, zarar körgen dört kişiden üçü 2014 senesi fevral 26-da olıp keçken adiselerde Ahtem Çiygoznı körmedi ve onıñ «kütleviy çatışmalarnıñ» teşkilâtçısı olaraq rolüni aytıp olamay.

İşğal altındaki Qırımnıñ Rusiye kontrol etken Yuqarı mahkemesi Qırımtatar Milliy Meclisiniñ reis muavini «Çiygoz işi» boyunca toplaşuvnı cuma künü, sentâbr 2-de, devam etecektir. Bunı Çiygoznıñ Rusiye advokatı Nikolay Polozov bildirdi.

Advokat Qırım.Aqiqatqa izaat berip, mahkeme yarım yılğa qadar sozula bilecegini tahmin etti.

«İşte bir sıra kişi bar, qabaat qararında 84 zarar körgen insan, qabaat tarafınıñ 78 şaatı, imayeniñ 30-dan ziyade şaatı qayd etile, bir sıra video mevcut, esnas eñ az bir qaç ay ve atta yarım yıl süre bile», – dep qayd etti Polozov.

Advokat imaye qabaatlanğannıñ mahkeme toplaşuvınıñ zalına ketirilmesini tekrar rica etecegini bildirdi. Bundan evel bütün muracaatlar red etilgen soñ mahkeme toplaşuvları videokonferentsiya vastasınen keçirile.

Sentâbr ayına keçirilmesi planlaştırılğan mahkeme toplaşuvlarınıñ cedveline köre, toplaşuvlar aftada üç kere olacaqtır.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG