Link açıqlığı

Qırımda taqip etilgen ukrain mühbiri Mıkola Semenanıñ adliyecisi Aleksandr Popkov belley ki, rusiyeli mahkeme tarafından adaletli ve aqlağan qararnıñ qabul etilecegi fırsatı sıfırğa yaqındır. Bu aqta Popkov Qırım.Aqiqatqa bergen izaatında bildirdi.

«Rusiye Federatsiyasında siyasiy işler boyunca, bu ise, şübesiz, siyasiy bir iştir, adaletli ve aqlağan qararnıñ alınması fırsatları sıfırğa yaqındır. Bizde (Rusiyede – QA) bu qabaatlav ne qadar añlaşılmağan, ne qadar mantıqsız olğanını aydınlatmaq imkân bar. Hususan Mıkola Semenanıñ işinde bu, mühbir, onıñ mühbircilik faaliyeti içün, onıñ aqqı bar olğan öz fikrini halqqa bildirgeni içün taqip etilgenini köstermeknen belgilenecek», – dedi Popkov.

Bundan evel Popkov bildirdi ki, oktâbr-noyabr aylarında mühbirniñ işi rusiyeli mahkemege teslim etilecek.

Baarde Qırımda kütleviy şekilde tintüvler, bu cümleden, Qırım.Aqiqat ile işbirlik tutqanında şeklenilgen mustaqil mühbirlerde tintüvler keçirildi. Radio Svoboda müellifi Mıkola Semenağa qarşı Rusiye Federatsiyasınıñ topraq bütünligini bozmaq çağırğanında şeklenilüv boyunca cinaiy iş açıldı. Rusiyeli taqiqat oña yarımadadan çıqmağa yasaq etti.

Avgust 29-da, bazarertesi künü Aqmescitteki Kiyev rayon mahkemesi belli ukrain mühbiri Mıkola Semenanıñ adliyecisi bergen FSB taqiqatçısınıñ areketlerine qarşı şikâyetini red etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG