Link açıqlığı

Çiygoz boyunca mahkemede zararlanğanlar onıñ «kütleviy nizamsızlıq» teşkil etüvinde olğan rolüni qayd etmey – Polozov


Sentâbr 1-de «Çiygoznıñ işi» boyunca mahkemede sorğuğa çekilgen kişilerden iç biri onıñ kütleviy nizamsızlıq teşkil etüvinde olğan rolüni qayd etmedi. Bu aqta Meclis reisi muavininiñ rusiyeli adliyecisi Nikolay Polozov bildirdi.

Polozovnıñ izaatını köstergen videonı Qırımtatar Qurultayı Merkeziy saylav komissiyasınıñ reisi Zair Smedlâyev Facebook saifesinde paylaştı.

Polozovnıñ sözlerine binaen, sentâbr 1-de toplaşuvda zararlanğan kişi olaraq sözde bulunğan Ukraina İçki işler nazirliginiñ sabıq hadimi Sergey Sinetskiy «Ahtem Çiygoznıñ bulunması ve areketleri boyunca añlaşılır bir şey aytıp olamadı».

«O ayttı ki, oña (Ahtem Çiygozğa – QA) nisbeten duşmanlıq duyğuları yoq», – dep qayd etti adliyeci.

Polozovnıñ bildirgenine köre, zararlanğan kişi bundan evel Çiygoznı bilgenini qayd etti, amma 2014 senesi fevral 26-da yüz bergen vaqialarda onıñ rolü aqqında bir şey aytıp olamadı.

Bundan evel, avgust 30-da Nikolay Polozov qayd etken edi ki, zararlanğan dört kişiden üçü 2014 senesi fevral 26-da vaqialar yüz bergen kün Ahtem Çiygoznı körmedi ve, bundan da ğayrı, onıñ «kütleviy nizamsızlıq» teşkilâtçısı olaraq rolüni qayd etip olamadı.

Ahtem Çiygoz 2014 senesi fevral 26-da Qırım Yuqarı Radası binası yanında Ukraina topraq bütünligine destek olaraq keçirilgen mitingde iştirak etkeni içün 2015 senesi yanvar ayında yaqalandı. İşğal etilgen Qırımnıñ rusiyeli ükümeti onı kütleviy nizamsızlıq yapqanında qabaatlay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG