Link açıqlığı

Qırımtatar Milliy Meclisi reisiniñ muavini İlmi Umerov deñişmez ağır alda buluna. Bu aqta rusiyeli adliyeci Nikolay Polozov sentâbr 1-de işğal etilgen Aqmescit hastahanesinde İlmi Umerovnı ziyaret etken soñ Facebook saifesinde bildiri.

«İlmi Umerovnı onıñ Aqmescit psihiatrik hastahanesinde qanunsız tutulğan yerinde kördim. Onıñ sağlıq alı qanaatlendirici olğanını aytıp olamam, deñişmez ağır desem, daa doğru olur. Bunen beraber, özüni saqlamaq içün hastahane memuriyeti er kün ondan talil ala, kardiogramma yapa», – dep yazdı Polozov.

Bundan da ğayrı, adliyeci qayd etti ki, ekim-ekspert Umerovğa sentâbr 7-de keçirilecek komissiya aqqında bildirdi, o yerde onıñ azat etilmesi aqqında qarar alınacaq.

Bundan evel rusiyeli adliyeci Mark Feygin, rusiyeli FSB hadimleri Qırımtatar Milliy Meclisi reisiniñ muavinini psihiatrik hastahanede sentâbr 7-ge qadar tutmağa qarar alğan soñ, sentâbr 3-te, cumaertesi künü narazılıq ve İlmi Umerovnen birdemlik aktsiyasını keçirmege çağırdı.

İşğal etilgen Qırım ükümeti 59 yaşındaki İlmi Umerovnı televizion yayınında «Rusiyeni Qırımdan ve Donbasstan çıqmaq mecbur etmek kerek» degen sözleri içün Rusiye topraq bütünligini bozmaq çağıruvlarda qabaatlaylar. Avgust 11-de Meclis reisiniñ muavini, sağlıq alına baqmadan, mahkeme qararına binaen psihiatrik hastahanege ekspertizağa ketirildi.

Resmiy Kiyev İlmi Umerovnı azat etmege bir qaç sefer talap etken edi. Keçken afta Avropa Birligi Rusiyeni Umerovnı deral azat etmege çağırdı. AQŞ Devlet Departamentinde Qırımtatar Milliy Meclisi reisiniñ muavini İlmi Umerovnıñ işğal etilgen Qırımda psihiatrik hastahanede tutulğanından qasevet çekkenlerini bildirdiler ve Rusiyeden onı azat etmege talap ettiler.

XS
SM
MD
LG