Yaqında keçirilecek «Qavqaz-2016» ögrenüvlerinde Rusiye Federatsiyasınıñ silâlı quvetleri Ukrainağa qarşı ameliyatnı işlep baqacaq. Böyle fikirni Qırım.Aqiqat Radiosınıñ saba yayınında Halqara meseleler boyunca ordu, konversiya ve silâsızlanuv tedqiqatı ukrain merkeziniñ müdir muavini Mihail Samus bildirdi.
«Uçaqlar, meselâ, Ukraina toprağındaki konkret nişanlarğa konkret ücümlerge oşağan vazifelerni işlep baqacaq. Tek bu ücümler poligonlarda işlep baqılacaq. Aynı böyle şekilde deñiz askerleri, Ukraina toprağında kibi, konkret emirlerni işke tüşürecek. Tek olar poligonlarda işlep baqılacaq», – dedi o.
Sentâbr 5-10 künleri Rusiye Federatsiyasında «Qavqaz-2016» ögrenüvleriniñ faal qısmı alıp barılacaq, cenübiy-ğarp strategik yönelişte teşkil etilgen ücümci ordu birleşmesiniñ ameliy faaliyeti işlep baqılacaq.
Avgust 18-de Ukraina prezidenti Petro Poroşenko ilân etti ki, Rusiye kütleviy şekilde Ukrainağa kire bile ve böyle alda arbiy vaziyet kirsetile bilecegini ayttı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
