Büyük Britaniya Rusiye ükümetini Qırımda psihiatrik hastahanede mecburen tutulğan Qırımtatar Milliy Meclisi reisiniñ muavini İlmi Umerovnı azat etmege çağıra. Bu aqta Ukrainadaki Byük Britaniya elçiliginiñ saytındaki beyanatta aytıla.
«Qırımtatar Milliy Meclisi reisiniñ muavini İlmi Umerovnıñ yaqalanması ve oña nisbeten davranması Büyük Britaniyanıñ teren qasevetini doğura. Onıñ mecburiy şekilde yaqalanması ve psihiatrik bölükte tutulması, bunen beraber, onıñ sağlığı yaramaylaşqanı aqqında malümat qasevetni doğura. Rusiye ükümetini insan aqları halqara qaidelerini ürmet etmege, Umerovnı deral azat etmege ve oña kerekli tıbbiy yardım almağa musaade etmege çağıramız», – dep aytıla elçilik saytındaki beyanatta.
Bundan da ğayrı, beyanatta Rusiye Federatsiyasından bütün halqara uquq qoruyıcı nezaret müessiselerine maniasız kiriş taqdim etmesi talap etile.
«Belli ki, Qırımda insan aqları teminlenmesi boyunca qaideler saqlanılmay, ve biz Rusiye Federatsiyasını bütün halqara uquq qoruyıcı nezaret müessiselerine maniasız kiriş taqdim etmege çağırmağa devam etemiz. Qanunsız Qırım işğalini tanımaymız ve tanımaycaqmız. Rusiye Qırımnı Ukrainağa qaytarmaq kerek», – dep qayd etile beyanatta.
İşğal etilgen Qırım ükümeti 59 yaşındaki İlmi Umerovnı televizion yayınında «Rusiyeni Qırımdan ve Donbasstan çıqmaq mecbur etmek kerek» degen sözleri içün Rusiye topraq bütünligini bozmaq çağıruvlarda qabaatlaylar. Avgust 11-de Meclis reisiniñ muavini, sağlıq alına baqmadan, mahkeme qararına binaen psihiatrik hastahanege ekspertizağa ketirildi.
Resmiy Kiyev İlmi Umerovnı azat etmege bir qaç sefer talap etken edi. Keçken afta Avropa Birligi Rusiyeni Umerovnı deral azat etmege çağırdı. AQŞ Devlet Departamentinde Qırımtatar Milliy Meclisi reisiniñ muavini İlmi Umerovnıñ işğal etilgen Qırımda psihiatrik hastahanede tutulğanından qasevet çekkenlerini bildirdiler ve Rusiyeden onı azat etmege talap ettiler.
