Avropa birligi elçileri kelecek afta 146 adamğa ve 37 şirketke qarşı viza sıñırlanması ve esaplarnıñ buzlatmasınıñ devam ettirilmesi aqqında qarar almağa azırlana, Avropa birliginiñ malümatına binaen, olar Ukraina topraq bütünligi bozuluvı içün mesüliyetliler.
Radio Svobodanıñ Avropa birligindeki menbaları bildirdiler ki, sanktisyalarnıñ altı ayğa uzattırılması aqqında qararnı, çoq muzakere etmeyip, bunıñ içün müddetniñ yekünlenecegi arfesinde, yani sentâbr 15-te qabul etilecek.
Sanktsiyalarğa oğraşacaqlarnıñ arasında Qırımdaki şirketler ve Rusiye tarafından Ukraina şarqında desteklengen silâlı taqımlarğa, bunen beraber, rusiyeli siyasetçiler, hususan baş nazir muavini Dmitriy Rogozin, Kremlniñ baş teşviqatçısı dep adlandırılğan televizion alıpbarıcısı Dmitriy Kiselöv ola.
Mart 10-da Avropa birligi Şurası 146 adamğa ve 37 şirketke qarşı Ukraina topraq bütünligi, mustaqilligi bozulması munasebetinen sanktsiyalarnıñ müddetini yarım yılğa devam ettirdi. Esaplarnıñ buzlatılması ve ziyaretler yasağı 2016 senesi sentâbr 15-ke qadar uzattırıldı.
Avropa birligi, 2014 senesinden başlap, bir qaç basamaqnen Moskvağa qarşı onıñ Ukrainağa nisbeten basqıncı siyaseti içün, yani Qırımnı işğal etkeni ve Donbassta Rusiye tarafını tutqan separatistlerge destek köstergeni içün sanktsiyalar kirsetti. Bu sanktsiyalar bir qaç sefer uzattırılğan edi, olar rusiyeli iqtisat saasında 2017 senesi yanvar ayında yekünlenecek.
Avropa birligi menbaları Radio Svobodağa bildirdi ki, Rusiyeniñ energetik, arbiy ve maliye saalarına qarşı bu sanktsiyalar oktâbr ayında Brüsselde Avropa birligi liderleri sammitinde muzakere etilecek.
