Link açıqlığı

Rostovda mahkemede «Hizb ut-Tahrir» işi boyunca yaqalanğanlarnıñ soñki sözüni diñleycekler


Rostov-na-Donu, «Hizb ut-Tahrir» işi boyunca mahkeme

Avgust 31-de, çarşenbe künü Şimaliy-Qavqaz okrug arbiy mahkemesinde «Hizb ut-Tahrir» işi boyunca mahkeme diñlevleri devam etecek, bu iş boyunca dört Qırım musulmanı mahküm etile.

Toplaşuvda Ruslan Zeytullayevniñ adliyecisi Emil Kurbedinov sözde bulunacaq. Diger qabaatlanğan kişilerniñ imayecileri öz çıqışlarını keçken afta yekünledi. Olardan episi olarnıñ tarafından imaye etilgen kişilerge aqlamanı soradı.

Bugünki toplaşuvda qabaatlanğanlarnıñ soñki söz aytacaqları beklenile.

Tartışma çerçivesinde prokuror Qırım musulmanları içün, yani Ruslan Zeytullayev içün, «teşkilâtçı» olaraq, 17 yılğa qattı nizam koloniyasına, Rustem Vaitov ve Nuri Primov içün yedi yılğa umumiy nizam tüzelme koloniyasına, Ferat Sayfullayev içün sekiz yılğa aynı umumiy nizam tüzelme koloniyasına qapatılmasını soradı.

Rostov-na-Donu şeerindeki Şimaliy Qavqaz okrug arbiy mahkemesinde «Hizb ut-Tahrir» teşkilâtınen bağlı olğanında qabaatlanğan Qırım musulmanları Ruslan Zeytullayev, Rustem Vaitov, Nuri Primov ve Ferat Sayfullayev mahküm etile. Olar 2015 senesi qışta Aqyarda yaqalandı. Mayıs ayında olarnıñ apiste bulunma müddeti oktâbr ayına qadar uzattırıldı.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG