Rusiyede devletniñ cenübinde ve işğal etilgen Qırımda keçirilgen ordunıñ arbiy azırlığını apansız teşkerüvniñ yekünleyici basamağına keçkenlerini bildireler.
Rusiye Mudafaa nazirligi matbuat hızmetiniñ bildirgenine köre, ordunıñ apansız teşkerilüviniñ yekünleyici basamağı merasimleri avgust 30-31 künleri keçirile.
«Cenübiy arbiy okrugnıñ 14 umumordu poligonında şimdiki vaqıtta taktika ve arbiy atuv ile taktika-mahsus ögrenüvler, ordunıñ (quvetlerniñ) ameldeki areketleriniñ işlep baqılması, ögrenüv fenleri boyunca kontrol dersleri keçirile», – dep aytıla beyanatta.
Rusiye Silâlı quvetleriniñ arbiy azırlığını apansız teşkerüv avgust 25-te başlandı. Tedbirler avgust 31-ge qadar devam etecek, dep bildirdi mudafaa naziri Sergey Şoygu. Ögrenüvler maqsatlarından biri – ordunıñ tez vaqıtta cenübiy-ğarp yönelişte arbiy azırlıqnı qaviyleştirmek qabiliyetine qıymet kesmektir.
Rusiye arbiy-naqliye uçaqları mahsus vazifeli bölüklerni Rusiye şimaliy-ğarbından Cenübiy arbiy okrug poligonlarına keçirdi. Ordunıñ arbiy azırlığını teşkerüvge 20 İl-76 uçağı celp etildi.
Avgust 26-da Qara deñiz flotunıñ 15 arbiy gemisi ve Qaspiy flotiliyanıñ 10 gemisi arbiy azırlıqnı teşkermek içün deñizge çıqtı.
Soñki vaqıtları rusiyeli orduda bu kibi teşkerüvler sıq keçirile.
