Fiyat ve keyfiyet nisbeti Herson vilâyetinde turizm inkişafına yol bere. Bunıñ içün, raatlanmaq içün bu yerni saylağan turistlerniñ sayısı çoqlaşa. Böyle fikirni Qırım.Aqiqat Radiosınıñ saba yayınında ukrain «Turizm inkişafı merkeziniñ» müdiri Vladimir Tsaruk bildirdi.
«Biz mevsimniñ eñ yüksek noqtasında Herson vilâyetinde bir qaç kurortnı baqıp çıqtıq: bu Jeleznıy Port, Primorskoye, Lazurnoyedir, ve bu kiçik kurort şeerlerinde aman-aman bütün musafirhaneler 100 fayız tolu edi», – dedi o.
Ekspertniñ fikrince, seneniñ soñuna qadar HErson vilâyetinde üç yarım million turist raatlanacaqtır.
«Mevsimniñ soñuna qadar Herson vilâyeti eñ azdan 3,5 million turistni qabul etecek, bu, o yerde kerçek olacaq turistlerdir», – dep qayd etti Tsaruk.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
