İşğal etilgen Qırımda Su-24MR istihbarat uçaqları, Rusiye Federatsiyası Silâlı quvetleriniñ arbiy azırlığını teşkerüv çerçivesinde, maskalanğan şartlı duşmannı tapmasını idman etip çıqtı.
Bu aqta Rusiye Mudafaa nazirliginiñ matbuat hızmeti bildire.
«Ordunıñ arbiy azırlığını teşkerüv çerçivesinde Cenübiy arbiy okrugnıñ operativ uçaq alanlarından Ğarbiy arbiy okrugnıñ Su-24MR istihbarat uçaqlarınıñ erkânları, Volgograd vilâyeti, Krasnodar ülkesi, Qırım cumhuriyetinde tanış olmağan poligonlarda turğan şartlı duşmannıñ maskalanğan idare noqtalarını ve canlı quvetler toplanğan yerlerini qıdıruv ve belgilev boyunca bir sıra oquv-arbiy vazifelerni işlep baqtı», – dep aytıla rusiyeli arbiy müessiseniñ beyanatında.
Rusiye Silâlı quvetleriniñ arbiy azırlığını apansız teşkerüv avgust 25-te başlandı. Tedbirler avgust 31-ge qadar devam etecek, dep bildirdi mudafaa naziri Sergey Şoygu. Ögrenüvler maqsatlarından biri – ordunıñ tez vaqıtta cenübiy-ğarp yönelişte arbiy azırlıqnı qaviyleştirmek qabiliyetine qıymet kesmektir.
Rusiye arbiy-naqliye uçaqları mahsus vazifeli bölüklerni Rusiye şimaliy-ğarbından Cenübiy arbiy okrug poligonlarına keçirdi. Ordunıñ arbiy azırlığını teşkerüvge 20 İl-76 uçağı celp etildi.
Avgust 26-da Qara deñiz flotunıñ 15 arbiy gemisi ve Qaspiy flotiliyanıñ 10 gemisi arbiy azırlıqnı teşkermek içün deñizge çıqtı.
Soñki vaqıtları rusiyeli orduda bu kibi teşkerüvler sıq keçirile.
