Rusiyeli adliyeci Mark Feygin ümüt ete ki, narazılıq ve İlmi Umerovnen birdemlik aktsiyasına bütün dünya ukrain ve qırımtatar cemiyetleri qol tutacaq. Umerovnıñ imayecisi, rusiyeli FSB hadimleri Qırımtatar Milliy Meclisi reisiniñ muavinini psihiatrik hastahanede sentâbr 7-ge qadar tutmağa qarar alğan soñ, aktsiyanı sentâbr 3-te, cumaertesi künü keçirmege çağırdı.
«O (aktsiya – QA), çeşit şeerlerde keçirile bile. Bu kibi aktsiyalarnıñ keçirilmesi boyunca tecribemiz büyüktir. O, Kiyevde, Ukrainada, em de bütün dünyada qırımtatar ve ukrain cemiyetleri olğan diger şeerlerde de, Türkiyeden Amerika Qoşma Ştatlarına qadar keçirile bile. Bu yapıla bilecek şey», – dep qayd etti Mark Feygin Qırım.Aqiqatqa bergen izaatında.
Aktsiyalar ne yerde ve nasıl şekilde keçirilecegi aqqında yerlerde faaller qarar alacaq.
«Umerovnı psihiatrik hastahaneden azat etmek talabınen rusiyeli yolbaşçılarğa bütün muracaatlardan soñ, bu olmadı. Demek ki, cemaat desteginiñ diger usullarını da qullanmaq kerek. Rusiyeli yolbaşçılarnı, qanunsız cinaiy mesüliyetke celp etilgen hasta adamğa nisbeten insan aqlarını böyle bozmağa olmay, dep qandırmaq içün», – dep qoştı adliyeci.
O, işğal etilgen Qırımnı terk etkenini ve şimdi Moskvada bulunğanını ayttı. Kelecek afta o kene de yarımadağa kelmege planlaştıra.
Bundan evel, avgust 30-da Mark Feygin bildirdi ki, Qırımda psihiatrik hastahanede endi eki afta devamında tutulğan Qırımtatar Milliy Meclisi reisniñ muavini İlmi Umerov 8 künden soñ azatlıqqa yiberile bile.
Abgust 29-da rusiyeli adliyeci Feygin bildirdi ki, Umerovnıñ işi boyunca taqiqatçı onı saba yiberecek edi, amma «soñki daqqa bunı yapmaqtan vazgeçti», bu adliyeciler, halqara cemaatçılıq ve uquq qoruyıcılarnıñ tarafından basım neticesinden olğanı körünmesin dep.
İşğal etilgen Qırım ükümeti 59 yaşındaki İlmi Umerovnı televizion yayınında «Rusiyeni Qırımdan ve Donbasstan çıqmaq mecbur etmek kerek» degen sözleri içün Rusiye topraq bütünligini bozmaq çağıruvlarda qabaatlaylar. Avgust 11-de Meclis reisiniñ muavini, sağlıq alına baqmadan, mahkeme qararına binaen psihiatrik hastahanege ekspertizağa ketirildi.
Resmiy Kiyev İlmi Umerovnı azat etmege bir qaç sefer talap etken edi. Keçken afta Avropa Birligi Rusiyeni Umerovnı deral azat etmege çağırdı. AQŞ Devlet Departamentinde Qırımtatar Milliy Meclisi reisiniñ muavini İlmi Umerovnıñ işğal etilgen Qırımda psihiatrik hastahanede tutulğanından qasevet çekkenlerini bildirdiler ve Rusiyeden onı azat etmege talap ettiler.
