İşğal etilgen Qırım ükümetiniñ Kremlge boysunğan sağlıq saqlav naziriniñ muavini avgust 30-da Qırımtatar Milliy Meclisi reisiniñ muavini İlmi Umerovnı ziyaret etti. Bu aqta rusiyeli adliyeci Nikolay Polozov bildirdi.
Umerov, Rusiyege boysunğan Qırım mahkemesiniñ qararı boyunca, Aqmescit hastahanesinde statsionar psihiatrik ekspertizada buluna.
«Qırım cumhuriyeti sağlıq saqlav naziriniñ muavini şarait ve ekspertiza keçirilmesinen tafsilâtlı meraqlana edi. Körüne ki, rusiyeli ükümet halqara basım astında qorqa. Bunen beraber, İlmi Umerovnen ekspert ameliyatları yapılmay ve onıñ statsionarda bulunmasınıñ devam etmesi sebepleri, FSB, Rusiye ükümetiniñ isteklerinden ğayrı, iç kimseniñ tarafından añlatılmay», – dep qayd etti adliyeci.
Qırım Sağlıq saqlav nazirliginiñ saytında qayd etile ki, müessise yolbaşçısınıñ muavinlerinden biri Marina Savinçukova ola.
Polozovnıñ sözlerine binaen, müessise memuriyeti İlmi Umerovğa, onıñ sağlığına diqqatlı davrana, kerekli mütehassıslarnı bere.
«Bunen beraber Umerovnı bugün FSB hadimi Şevçenko (bundan evel SBU hadimi) ziyaret etti. Onıñ sözlerine binaen, İlmi Umerovnı o yerde sentâbr 7-ge qadar tutacaq olalar. Bugün imayeciler, İlmi Umerovnıñ deral azat etilmesi içün, FSB taqiqatçısına bir sıra şefaat arizasını yollaycaq», – dep qoştı Polozov.
O, ukrain ükümetini «bu meselede daa qattı söz aytmağa ve areket etmege» çağırdı.
İşğal etilgen Qırım ükümeti 59 yaşındaki İlmi Umerovnı televizion yayınında «Rusiyeni Qırımdan ve Donbasstan çıqmaq mecbur etmek kerek» degen sözleri içün Rusiye topraq bütünligini bozmaq çağıruvlarda qabaatlaylar. Avgust 11-de Meclis reisiniñ muavini, sağlıq alına baqmadan, mahkeme qararına binaen psihiatrik hastahanege ekspertizağa ketirildi.
Keçken afta Avropa Birligi Rusiyeni Umerovnı deral azat etmege çağırdı.
