Qırımda psihiatrik hastahanede endi eki afta devamında tutulğan Qırımtatar Milliy Meclisi reisniñ muavini İlmi Umerov 8 künden soñ azatlıqqa yiberile bile. Bu aqta rusiyeli adliyeci Mark Feygin avgust 30-da Facebook saifesinde bildirdi.
«FSB Umerovnı psihiatrik hastahanede sentâbr 7-ge qadar, yani daa 8 kün tutmağa niyetlene. Böyle etip, olar halqara basım astında öz «çorlanmağanlarını» köstere. Biz, 3.09.2016 s., cumaertesi künü halqara narazılıq ve İlmi Umerovnen birdemlik aktsiyasına çıqmağa çağıramız. Bütün dünyadaki ukrain ve qırımtatar cemiyetlerini bizge destek köstermege rica etemiz», – dep yazdı Feygin.
Abgust 29-da rusiyeli adliyeci Feygin bildirdi ki, Umerovnıñ işi boyunca taqiqatçı onı saba yiberecek edi, amma «soñki daqqa bunı yapmaqtan vazgeçti», bu adliyeciler, halqara cemaatçılıq ve uquq qoruyıcılarnıñ tarafından basım neticesinden olğanı körünmesin dep.
İşğal etilgen Qırım ükümeti 59 yaşındaki İlmi Umerovnı televizion yayınında «Rusiyeni Qırımdan ve Donbasstan çıqmaq mecbur etmek kerek» degen sözleri içün Rusiye topraq bütünligini bozmaq çağıruvlarda qabaatlaylar. Avgust 11-de Meclis reisiniñ muavini, sağlıq alına baqmadan, mahkeme qararına binaen psihiatrik hastahanege ekspertizağa ketirildi.
Resmiy Kiyev İlmi Umerovnı azat etmege bir qaç sefer talap etken edi. Keçken afta Avropa Birligi Rusiyeni Umerovnı deral azat etmege çağırdı. AQŞ Devlet Departamentinde Qırımtatar Milliy Meclisi reisiniñ muavini İlmi Umerovnıñ işğal etilgen Qırımda psihiatrik hastahanede tutulğanından qasevet çekkenlerini bildirdiler.
