Özbekistan prezidenti İslam Karimovnıñ taqdiri belgisiz qala, avgust 30-da onıñ sağlığı aqqında resmiy izaat yoq.
Tünevin bazı kütleviy haber vastaları Karimovnıñ ölümi aqqında bildirgen edi, onıñ hastahanege ketirilmesi aqqında malümat eki kün evel peyda oldı. Diger kütleviy haber vastaları bu malümatnı red etti ve Özbekistan prezidentiniñ istiqrarlı alı aqqında ilân etti.
Rusiye prezidentiniñ temsilcisi Dmitriy Peskov qayd etti ki, Kremlde Karimovnıñ ölümi aqqında beyanat tasdıqlanmağanına esaslanalar. Onıñ alı aqqında iç yañı malümat yoq, dep qoştı Peskov.
Avgust 29-da Özbekistan prezidentiniñ qızlarından biri Lola Karimova-Tillâyeva içtimaiy ağda bildirdi ki, İslam Karimovnıñ cumaertesi künü saba qanı miyine aqtı ve o reanimatsiyada buluna. O vaqıt onıñ qızı ayttı ki, babasınıñ alı istiqrarlıdır.
78 yaşındaki Karimovnıñ hastahanege ketirilmesi aqqında, o vaqıt daa tafsilâtlı malümat olmadan, bazar künü belli oldı. Özbekistan yolbaşçısı vazifesini 25-ten ziyade yıl devamında eda etken Karimov soñki sefer devlet televizionına avgust 17-de çıqqan edi.
