Avgust 29-da aqşam Aqyar-Aqmescit yolunda Opel Vectra ve Mercedes Sprinter sefer avtobusınıñ iştiragınen qaza yüz berdi.
Fevqulade vaziyetler nazirliginiñ Qırım idaresi matbuat hızmetinde bildirdiler ki, qaza yolnıñ 31-ci kilometrinde oldı. Qurtarıcılar zararlanğan kişini bloktan azat etmege mecbur oldı. Zararlanğanlarnıñ sayısı aqqında müessisede bildirilmey.
«Krıminform» saytınıñ bildirgenine köre, GİBDD Qırım idaresinde qaza neticesinde beş kişi zararlanğanı, bu cümleden eki bala aqqında aytalar.
Aynı vaqıtta Kremlge boysunğan Qırım sağlıq saqlav nazirlginde Qırım neşrine qazada altı adam zararlanğanını bildirdiler.
«Qaza neticesinde altı kişi zararlandı. Dört adam hastahanege ketirildi, eki kişige ambulator yardımı kösterildi. Ağır alda kimse yoq edi», – dep bildire neşir Qırım sağlıq saqlav nazirliginiñ beyanatını.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
