Link açıqlığı

Qırımtatar Milliy Meclisiniñ reis muavini İlmi Umerov işğal etilgen Aqmescitteki psihiatrik hastahanede olğan şarait aqqında añlattı, bunıñ deşetli olğanını qayd etti. Onıñ sözlerine köre, onı qapısız bir odada diger aqaylarnen beraber tutalar, olarğa mecburen psihiatrik ekspertizanıñ keçirilmesi belgilendi. Tıbbiy müessisede temizlik qaideleri saqlanılmay. Bu aqta İlmi Umerov Radio Svobodağa bergen intervyusında bildirdi.

​«Bu, psihologik basımdır, onı qıynav dep adlandırmaq mümkün. Çünki normal bir insan böyle şaraitke qoyulsa, o, vaqıt keçken soñ onıñ yanında olğanlarğa oşaycaq. Odada qapı yoq, gece-kündüz qıçırma, sögünç, siydi-sıçtı, davalaştı, daa bir şeyler köresiñ ve eşitesiñ. Böyle şaraitte normal bir insanğa bulunmaq oñaytsızdır... Eñ büyük problema, temizlik qaideleriniñ saqlanmasıdır. Deşetli ayaqyol, deşetli duş. O yerge kirmek aman-aman imkânsızdır. Maña hızmetçiler içün duşnı qullanmağa ruhset ettiler, o yerde şarait pek te yahşı degil, amma, iç olmasa, seyircilersiz», – dep ayttı Meclis reisiniñ muavini.

Başta İlmi Umerov bir özü odağa qoyuldı, amma bundan soñ oña daa eki kişi qoşuldı. Olardan biri boyunca cinaiy iş açılğan, böyle vaziyette psihiatrik ekspertiza mıtlaqa keçirile.

«Ekincisi, kerçekten de, hastadır. Bir şey bir yerde hırsızladı-sattı, oña psihiatrik ekspertizanıñ keçirilmesi belgilendi, bundan soñ mecburiy tedaviylenüvni belgilemek içün», – dep qayd etti İlmi Umerov.

İşğal etilgen Qırımğa İlmi Umerovnı psihiatrik hastahaneden azat etmek içün kelgen rusiyeli adliyeci Mark Feygin avgust 29-da bildirdi ki, rusiyeli FSB taqiqatçısı onı azat etmekten vazgeçti.

Rusiyeli FSB bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Sağlıq alına baqmadan, Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı. 59 yaşındaki İlmi Umerovnıñ şeker diabeti, Parkinson hastalığı bar, bunen beraber, oña yürek ameliyatı yapılğan edi.

Ukraina, Avropa Birligi, halqara uquq qoruyıcı teşkilâtları Rusiyeni İlmi Umerovnı azat etmege çağırdı.

XS
SM
MD
LG