Avgust 29-da, bazarertesi künü Aqmescitteki Kiyev rayon mahkemesi belli ukrain mühbiri Mıkola Semenanıñ adliyecisi bergen FSB taqiqatçısınıñ areketlerine qarşı şikâyetini red etti. Bu aqta Qırımtatar Milliy Meclisi reisiniñ birinci muavini Nariman Celâl Facebook saifesinde bildirdi.
«Taqiqatçı, adliyeci ve onıñ tarafından imaye etilgen kişige şefaat arizasınıñ qanaatlendirilmesi boyunca red etüv aqqında qararlarnen imkân bermey, bu ise, Mıkola Semenanıñ aqlarını tolusınen imaye etüvde mania ola. Mahkeme şefaat arizasınıñ qanaatlendirilüvini red etti», – dep yazdı Celâl.
İşğal etilgen Qırımda «separatizmde» qabaatlanğan yarımada mühbiri Mıkola Semenanıñ imayecisi onıñ Kiyevge tedaviylenüv içün yiberilmesi aqqında şefaat arizasını berdi.
Baarde Qırımda kütleviy şekilde tintüvler, bu cümleden, Qırım.Aqiqat ile işbirlik tutqanında şeklenilgen mustaqil mühbirlerde tintüvler keçirildi. Radio Svoboda müellifi Mıkola Semenağa qarşı Rusiye Federatsiyasınıñ topraq bütünligini bozmaq çağırğanında şeklenilüv boyunca cinaiy iş açıldı. Rusiyeli taqiqat oña yarımadadan çıqmağa yasaq etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
