Ukraina Devlet sıñır hızmetiniñ askerleri işğal etilgen Qırım ile memuriy sıñır yanında ve diger yönelişlerde Rusiye silâlı quvetleriniñ faaleşkenini qayd etmege devam ete. Bu aqta ukrain müessisede bildireler.
«Soñki kün devamında Azaq-Qara deñiz regional idaresiniñ sıñırcıları memuriy sıñırlarğa yaqın Mi-8 vertolötınıñ vaqtınca işğal etilgen Qırım Muhtar cumhuriyeti üstünde uçqanını kördi. Bunen beraber, sıñır müessisesiniñ bölükleri işğal etilgen yarımada territoriyasında arbiy tehnikanıñ faal olğanını qayd etti. Bundan da ğayrı, işğalciler bu yönelişte hızmet etken sıñırcılar noqtalarına projektorlarnen yarıqlatmağa tırıştı», – dep aytıla matbuat hızmetiniñ beyanatında.
Bundan evel Devlet sıñır hızmetinde bildirgen ediler ki, rusiyeli askerlerniñ Qırım ile memuriy sıñır yanındaki noqtaları zemaneviy tehnikanen teminlene. Hususan, memuriy sıñırdaki vaziyet rusiyeli FSB yarımadada «ukrain devarsantlarını» tutqanı aqqında ilân etken soñ kerginleşti.
Avgust 25-te, cumaaqşamı künü Rusiye mudafaa nazirligi Ukrainanen sıñır ve işğal etilgen Qırım ile memuriy sıñır boyunca ordunıñ arbiy azırlığınıñ apansız teşkerüvi aqqında ilân etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
