Link açıqlığı

Rusiyeli uquq qoruyıcılar Qırımda «Hizb ut-Tahrir» işi boyunca yaqalanğannıñ evile kelgen – Smedlâyev


Zair Smedlâyev

Avgust 27-de Qırımnıñ rusiyeli politsiyası hadimleri «Hizb ut-Tahrir» işi boyunca yaqalanğan Zevri Abseitovnıñ Bağçasaraydaki evine keldi. Amma soy-soplar uquq qoruyıcılarnı evge yibermedi. Bu aqta Qırım.Aqiqatqa Qırımtatar Qurultayı Merkeziy saylav komissiyasınıñ reisi Zair Smedlâyev bildirdi.

«Politsiya hadimleri kirmege tırıştı. Zevri Abseitovnıñ apayı evde yoq edi. Evde tek qart ana-babası bar edi. Olar politsiya hadimlerini içine yibermedi. Olar bularğa añlata edi ki, bir şey baqıp çıqmaq kerekler eken. Amma bu yerde vaziyet böyle: Abseitov «Hizb ut-Tahrir» işi boyunca yaqalanğan ola, bu teşkilât Rusiyede terroristik sayıla. Bugün politsiya hadimleri «bir şey baqmaq içün» kelip, bir şey atıp qoya bile. Yarın ise, FSB kelir ve bir şey tapar – ya silâ, ya narkotiklerni», – dep ayttı Smedlâyev.

Onıñ qayd etkenine köre, politsiya hadimleriniñ ziyareti resmiy degil edi. Uquq qoruyıcılar tintüv keçirmek içün iç qarar vesiqalarını taqdim etmedi.

Mayıs 12-de Bağçasarayda rusiyeli uquq qoruyıcılar musulmanlarnıñ evlerinde ve yerli qavehanede bir sıra tintüvler keçirdi. Neticede, dört Bağçasaray sakini yaqalandı ve terrorizmde qabaatlandı: Zevri Abseitov, Remzi Memetov, Rustem Abeltarov ve Enver Mamutov. Olar FSB hadimleri tarafından Rusiyede terroristik teşkilâtı olaraq tanılğan «Hizb ut-Tahrir» teşkilâtında iştirak etkenlerinde şeklenilip yaqalandı.

Er dört kişiniñ apiste bulunma müddeti iyül 6-da Rusiyege boysunğan Qırım mahkemesi alğan qararınen oktâbr 11-ge qadar uzattırıldı.

XS
SM
MD
LG