Slovakiya baş naziri Robert Fitsonıñ fikrince, Avropa birligi tarafından Rsuiyege qarşı onıñ Ukrainağa nisbeten yapqan areketleri içün kirsetilgen sanktsiyalar maqsadına irişmedi. Bu aqta o Moskvada Rusiye prezidenti Vladimir Putin ile körüşüvden soñ ilân etti, dep bildire slovakiyalı Pravda gazetası.
«Mence, bu mevzuğa ratsional davranmaq ve sanktsiyalar em Avropa birligine, em de Rusiye Federatsiyasına zarar ketirgeni aqqında ilân etmek vaqtı keldi. Olar, tesir etmek kerek olğan saalarda bir şey bermedi», – dep ayttı Slovakiya baş naziri.
Fitso qayd etti ki, Slovakiya, Avropa birliginiñ devlet-azası olaraq, boynuna alğan mecburiyetlerni işke tüşüre, amma onıñ sanktsiyalar meselesi boyunca şahsiy fikri «yahşı bellidir».
Şimdiki vaqıtta Slovakiya Avropa birliginde reislik yapa, ve kelecek afta birleşmeniñ tışqı işler nazirleriniñ körüşüvini qabul etmege azırlana, o yerde Rusiyege qarşı sanktsiyalar meselesi de muzakere etilecek. Slovakiya Rusiyeden aman-aman bütün gaz ve yermaynı ital ete, bunen beraber, bu devletten öz eki atom elektrik stantsiyası içün özek yaqarlığını ala. Slovakiya Rusiyege çoq Avropa markalı avtomobillerni ihrac ete.
Fitsonıñ fikrine oşağan Macaristan ükümetiniñ noqta-i nazarı da bar. Çehiya prezidenti Miloş Zeman da bir qaç sefer sanktsiyalarnı toqtatmağa çağırğan edi.
Avropa birligi, 2014 senesinden başlap, bir qaç basamaqnen Moskvağa qarşı onıñ Ukrainağa nisbeten basqıncı siyaseti içün, yani Qırımnı işğal etkeni ve Donbassta Rusiye tarafını tutqan separatistlerge destek köstergeni içün sanktsiyalar kirsetti. Bu sanktsiyalar bir qaç sefer uzattırılğan edi, olar rusiyeli iqtisat saasında 2017 senesi yanvar ayında yekünlenecek.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
