Rusiyege boysunğan Aqyar gubernatorınıñ vazifelerini vaqtınca eda etken Dmitriy Ovsânnikov şeer pedagog işçileri konferentsiyasında iştirak etti. O, Aqyar tasil nizamı inkişafı boyunca iş vazifelerinden ocalarnıñ aylıqları köterilmesini de qayd etti.
«Menim tarafımdan eñ çoq diqqat müessiselerniñ maddiy-tehnikiy bazasınıñ qaviyleştirilmesi, ocalarnıñ aylıqları seviyesiniñ köterilmesi, yañı obyektler quruvına ayırılacaq. Hususan, Kazaçya buhtada mektep quruvı bu seneniñ soñuna qadar bitirilmek kerek. Bunen beraber, 5-6 obyekt 2017-2018 seneleri leyha yapılması ve nevbetteki para ayırılması boyunca planlarğa kirsetilecek», – dep bildire Ovsânnikovnıñ sözlerini şeerniñ ameldeki memuriyet saytı.
Bütün Rusiye cemaat fikri ögrenüvi merkeziniñ sorav neticelerine binaen, rusiyelilerniñ üçte birinden ziyade oca zenaatını prestij olmağanını saya, ve aman-aman yarısı (42 fayız) belley ki, oca aylığı yahşı yaşamağa imkân bermey. 2014 senesi soravdan keçken kişilerniñ 29 fayızı ocalarnıñ maddiy amansızlığını qayd etti.
Avgust 20-de Rusiye ükümeti yolbaşçısı Dmitriy Medvedev ocalarnıñ aylığınen bağlı vaziyetni «uyğun» olğanını ayttı, pedagoglarnıñ vaziyeti kerginleşkenini ise mümkün olmağanını qayd etti.
Avgust başında Medvedev, Dağıstanlı ocanıñ kiçik aylıqlar aqqındaki sualge cevap berip, pedagoglarğa ya «bizneske barmağa», ya «boyun egmege» tevsiye etti. Mayıs ayında, Qırım sakinleriniñ kiçik pensiyağa şikâyetlerine cevap berip, nazir ilân etti ki, devlette para yoq, ve olarğa «dayanmağa» çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
