Link açıqlığı

Qırım işğal etilgen soñ Aqmescit akademik gimnaziyası dep adlandırılğan Ukrain mektep-gimnaziyasında yañı oquv yılından başlap 1-ci ve 2-ci sınıflarda ukrain tili dersleri olmaycaq. Bu aqta «Qırım ukrainleri» Facebook cemiyetiniñ saifesinde bildirile.

«Er parallelde, 6-cı ve 10-cı sınıflardan ğayrı, bir qaç yer bar edi. Ukrain tilinen 1-ci ve 2-ci sınıflar endi yoq», – dep aytıla beyanatta.

Bu malümatnı Qırım.Aqiqatqa Kremlge boysunğan Qırım Tasil nazirliginiñ matbuat kâtibi Anton Garkavets tasdıqladı.

«Kerçekten de, birinci ve ekinci sınıfta ukrain tilinde tasil başqa berilmey. Balanıñ tilni ögrenmesi aqqında qararnı ana-babalar ala, ve olarnıñ arizalarına köre sınıflar teşkil etile. Soñki eki yıl devamında ana-babalar olarnıñ balaları ukrain tilinde tasil alacağını istemedi», – dedi o.

Garkavetsniñ sözlerine köre, 10-cı sınıfqa qadar bala, yarımadada devlet statusı olğan üç tilden tasil alma tilini saylay bile: rus, ukrain ya da qırımtatar tili. 10-cı ve 11-ci tasil tek rus tilinde berile.

Ukrain mektep-gimnaziyası 2014 senesi, Rusiye Qırımnı işğal etken soñ, Aqmescit akademik gimnaziyası dep adlandırıldı. Mektep müdiri Natalya Rudenko istifağa çıqmaq içün ariza bermek mecbur oldı. O vaqıt Qırım ükümeti yolbaşçısı Sergey Aksönov, gimnaziyada tasilniñ ukrain tilinde berilmesi devam etecek, dep aytqan edi.

XS
SM
MD
LG